EUSKAL TRENBIDE SAREA

Batzorde Iraunkorrak negoziazioan aurrerapausoak eta plantilla indartzea exijitzen dio Zuzendaritzari

2026/11/20
Batzorde Iraunkorrak negoziazioan aurrerapausoak eta plantilla indartzea exijitzen dio Zuzendaritzari
Batzordeak Zuzendaritzari bere jarrera aldatzeko eskatzen dio, eta ohartarazten du lanaren berrantolaketa ezin dela langileen lan-karga handitzearen eta trenbide-segurtasunaren kaltetan egin.19 hilabeteko negoziazioaren ondoren, Batzorde Iraunkorrak salatzen du Zuzendaritzaren proposamenak oraindik ez diela langileen beharrei erantzuten, eta azaroaren 21erako elkarretaratzeak deitu ditu Donostian.

Euskal Trenbide Sareko (ETS) Batzorde Iraunkorrak salatzen du, 19 hilabeteko negoziazioaren ondoren, Zuzendaritzak oraindik ez duela langileen aldarrikapen ekonomiko, sozial eta laboralei erantzungo dien proposamen duinik aurkeztu. Langileek negoziatzeko eta jarrerak hurbiltzeko borondatea erakutsi dute. Orain, Zuzendaritzari dagokio immobilismoa alde batera utzi eta bere erantzukizuna bere gain hartzea.
ETS hazi egin da geltoki eta azpiegitura berriekin, maiztasun eta zerbitzu gehiagorekin eta sistema eta teknologia berrien ezarpenarekin. Hazkunde horrek ETSko hainbat kolektiboren lan-karga eta erantzukizunak handitu ditu, besteak beste, ustiapeneko eta mantentze-lanetako langileenak. Zuzendaritzak, ordea, oraindik ez du plantilla zerbitzuaren benetako beharretara egokitu.
Azkenaldiko gertakariek berriro agerian utzi dute beharrezkoa dela eguneroko jarduerari, lan-karga handieneko uneei eta aldi berean gertatzen diren gorabeherei aurre egiteko behar adina langile izatea, beharrezko txanda-erreleboak eta atsedenaldiak bermatuz. Eginkizun espezializatuak betetzeko, zirkulazioari lotutakoak barne, prestakuntza espezifikoa eta belaunaldi-erreleboaren plangintza behar dira.
Batzorde Iraunkorrak Zuzendaritzari exijitzen dio lanaren berrantolaketa eta banaketa berrikus ditzala, eta lan-kargagatik eta erantzukizunengatik hala behar duten kolektiboetako langile-kopurua handitu dezala. Trenbide-segurtasuna eta zerbitzu publikoaren kalitatea ezin dira langileen etengabeko gehiegizko ahaleginaren mende egon.
Horregatik guztiagatik, Batzordeak honako hau exijitzen dio ETSko Zuzendaritzari:
    • Aurkeztutako proposamen ekonomikoa nabarmen hobetzea.
    • Erantzukizunen eta lan-kargaren handitzea benetan aitortzea.
    • Egungo azpiegitura, zerbitzu eta beharretara egokitutako plantilla izatea.
    • Lan- eta gizarte-baldintzetan aurrerapauso zehatzak ematea.
    • Benetako proposamenekin eta hitzarmen duin bat lortzeko borondatearekin negoziatzea.