Bizkaiko Foru Aldundiak eta Interbiak-ek langileak murriztu eta Supersurreko bidesari-zerbitzua okertu dute

2021/03/29
Bizkaiko Foru Aldundiak eta Interbiak-ek langileak murriztu eta Supersurreko bidesari-zerbitzua okertu dute
Artxiboko irudia
ELAk salatu duenez, egoera horren ondorioz, hainbat ibilgailuk kontrako noranzkoan gidatu dute, kontrol lanak egiteko ordainlekuetan langilerik ez dagoelako. Bizkaiko Foru Aldundiari eta bidesariak kudeatzen dituzten enpresei zerbitzu presentzialaren alde egitea eskatu die sindikatuak, zerbitzuaren murrizketa eta automatizazioa baztertzeko, langileen eta zerbitzuaren mesedetan.

ELAk adierazi du Transbisa, Metropoliaren Hegoaldeko Saihesbidea eta Artxandako Tunelak kudeatzen dituen enpresa, azken urteotan etekin handiak lortu dituena, egoera aprobetxatzen ari dela hainbat kolektiboren lanpostuak kentzeko, batez ere Supersurreko bidesarietan, hori guztia Bizkaiko Foru Aldundiaren eta Interbiak-en adostasunarekin. Langile hauek lanaldi partzialeko kontratazioa

eta behin-behinekotasun-tasa altua pairatzen dute (Aldundiak kontratu mugagabeak egiten uzten ez diela argudiatuta), eta enpresak euren lan-baldintzak nahieran aldatzen dizkie, funtzio desberdinak egitera behartzeko. ELAk dagoeneko salatu du hori epaitegian. Gauzak horrela, lege iruzurreko kontratazioan, espekulazioan eta langileen presentziarik gabeko bidesarietan oinarritutako eredua ezartzea leporatu dio sindikatuak enpresari.

Gainera, kontuan hartu behar da une honetan AP-8 autobidea Bizkaiko zatian lizitatzeko eta esleitzeko prozesua martxan dela eta Transbisa aurkeztu dela. Hortaz, ELAk Bizkaiko Foru Aldundiari eta Bizkaian bidesariak kudeatzen dituzten enpresei zerbitzu presentzial baten alde egiteko eskatzen die.