ELAk indarkeriarik gabeko mobilizazio masiboak nabarmendu ditu, eta ohartarazi du istiluek indar erreakzionarioei bakarrik egiten dietela mesede

ELAk Euskal Herri osoan mezu faxistei erantzuteko egiten ari diren mobilizazio baketsuak azpimarratu ditu; izan ere, gorrotoan sakontzeko mezu antidemokratikoak zabaltzen dituzten pertsona eta erakundeei ezin zaie komunikabideen ahotsa eman. ELA mobilizazio horietan parte hartzen ari da, bere borroka antifaxistaren konpromiso gisa.

Konpromiso horrekin bat etorriz, ELAk uste du mobilizazio masibo horiek amaitu ondoren izandako gertakariek mezu antifaxistaren balioa indargabetzen dutela.

Horregatik, ELAk arbuiatu egin ditu ekintza horiek, eta, aldi berean, bere konpromiso antifaxista indartzen jarraituko du, indarkeriarik gabeko mobilizazio masiboekin bat eginez.

Azkenik, ELAk ohartarazi du indar erreakzionarioenak direla, hain zuzen ere, etekin politikoa ateratzen dutenak azken egunetan gertatutakoak bezalako egoerengatik.