ELAk enpresa publikoetako langileei %5 itzultzea eskatu du

2016/03/11
ELAk enpresa publikoetako langileei %5 itzultzea eskatu du
Ia 6 urteko gatazka laboral eta judizialaren ostean Konstituzio Auzitegiak konstituzioaren kontrakotzat jo zuen soldataren %5 murriztea, Patxi Lopezen gobernuak, EAEko Aurrekontu Orokorren Legearen bidez, EAEko enpresa publikoetako langileei aplikatu ziena. ELAk elkarretaratze bat egin du Lakuan, Eusko Jaurlaritzak soldatatik legez kontra kendutako %5 itzultzea eskatzeko.

Eusko Jaurlaritzaren murrizketa horri EAEko herri-langileek mobilizazioez erantzun zioten, eta mobilizazio horien artean greba-egun bat egin zen euskal sektore publiko osoan.

Konstituzio Auzitegiak deusez deklaratu zuen Aurrekontuen Legearen 23.9 artikulua, 2015eko uztailaren 31ko Epaiaren bidez. Epai horren arabera 8/2010 Errege Lege Dekretuak murrizketatik kanpo utzi zuen langile-talde hori, baina Patxi Lopezen gobernuak bere kabuz EAEko enpresa publikoetara luzatu zuen murrizketaren eragina, salbuetsita egon arren.

Epaia argitaratu ondoren, Urkulluren gobernuak ez du ezer egin; hori dela-eta, eskatzen diogu Eusko Jaurlaritzari berehala zuzentzeko, legez kontrako prozedura hori, alegia, EAEko enpresa publiko guztietako langileei soldataren %5 murriztearena, eta baita milaka herri-langileri egindako diru-kaltea konpentsatzeko ere.