Nominak kobratzeko garaian atzerapenak salatu dituzte garbitzaileek

Barakaldoko kirol instalazioetako garbiketa zerbitzuaz arduratzen den Prointal enpresako langileek hilabete batzuk daramatzate soldatak atzerapenekin jasotzen. Egoera jasangaitz honen aurrean, elkarretaratzea egin dute Lasesarreko kiroldegiaren aurrean, euren ezinegona ikusarazteko eta berehalako konponbidea eskatzeko.

Prointalek Barakaldoko Udalaren ustezko zor bati egozten dizkio atzerapenak, baina langileek salatu dutenez, beste behin ere, langile prekarizatuenak dira enpresen eta administrazio publikoen arteko administrazio eta finantza gatazken ondorioak pairatzen dituztenak.

Plantillak Prointal enpresari eta Barakaldo Kirolaki eskatzen die beren erantzukizunak beren gain hartzeko eta soldaten ordainketa puntuala bermatzeko, baita garbiketako langileen lan egonkortasuna bermatzeko ere, beraiek direlako eguneroko lanarekin kirol instalazioak martxan mantentzen dituztenak.