TTIP-i buruzko bozketa Europar Parlamentuan

2015/07/08
TTIP-i buruzko bozketa Europar Parlamentuan
Europar Parlamentuan TTIParen inguruan ekainean eztabaidatu eta bozkatzekoa zen ebazpena azkenean aste honetan iritsiko da ganbera honetara. Ebazpena duela hainbat hilabetetik hona ari dira prestatzen; TTIPi buruz Europar Parlamentuaren posizioa jasoko du, eta loteslea ez bada ere, Europar Batzordeari lagungarri izango litzaioke AEBrekin egiten ari den negoziazioetarako.

ELAk gogoratu du aurreko hilean eztabaida eta bozketa azken orduan atzeratu zirela, teorian zuzenketa kopuru handia sartu zelako. Alabaina, antza bertan behera uztea areago izan zen erabaki taktiko bat; batik bat ISDSk (inbertitzaile eta estatuen arteko gatazkak konpontzeko prozedura) eragin duen mesfidantzak zalantzan jartzen zuen bozketaren emaitza, eta iritzi publikoak gai hau oso adi jarraitzen zuen.

Orain Parlamentuko lehendakari den Martin Schultz sozialdemokrata alemanak ISDSari buruzko zuzenketa berri bat proposatu du, eta honek bi talde nagusien arteko konpromisoa islatzen du, Europako Alderdi Popularraren eta Sozialdemokraten artekoa.

Batzordearen proposamenarekin bat, zuzenketak mantendu egiten du inbertitzaile atzerritarrentzako pribilegiozko mekanismo edo sistema bat, sistema judizial nazionaletatik at. Sistema honekin multinazionalen interesak betiere interes orokorraren gainetik geratzen dira.

ISDSaren funtsa ukitu gabe uzteko aldaketa txiki batzuk egin dituzte, hots, zerbait aldatzea ezer alda ez dadin.

Ez gaituzte engainatuko, saiatuko diren arren. Esango digute zuzenketak ISDSa TTIPetik ezabatzea bermatuko duela, eta garaipen handi bat izango dela. Baina hori ez da egia.

Garaipen bakarra TTIP baztertzea izango da.