ELAk auzitara eraman ditu patronalak, hitzartutakoa bete ez dutelako
Euskal Autonomia Erkidegoko Justizia Auzitegi Nagusiak (EAEAN) asteazken honetan egin du ELAk Kristau Eskolaren eta AICE-IZEAren aurka jarritako auziaren epaiketa. Sindikatuak patronalei egozten die negoziazio kolektiboan lortutako akordioak behin eta berriz ez betetzea. Gizarte Ekimeneko ikastetxeetako ordezkariak epaitegien aurrean bildu dira, askatasun sindikala urratu dela aitortzea eta patronalei zehapenak ezartzea eskatzeko.
Gatazkaren azken auzia irakasleen zuzeneko irakastorduak murrizteari dagokio. 2024ko otsailean sinatutako akordioak, hamalau greba-egun egin ondoren lortutakoak, ezarri zuen 2025-2026 ikasturtetik aurrera astean ordubete gutxituko zela zuzeneko irakaskuntza, eta beste ordubete osagarri gehituko zela prestaketa-lanetarako. Patronalek, ordea, bigarren ikasturtez jarraian agindu diete ikastetxeei neurri hori ez aplikatzeko. EAEANk hitzartutakoa betetzera behartu ditu, baina patronalek Auzitegi Gorenean errekurritu dute erabakia.
ELAren arabera, ez-betetze horiek urteak daramatzate errepikatzen. 2010etik 2026ra bitartean, bete gabeko hainbat akordiorengatik bost aldiz jo behar izan du sindikatuak auzitegietara. Besteak beste, 2010ean soldatak % 5 murrizteko saiakera salatu du —Eusko Jaurlaritzaren finantzaketa-murrizketak argudiatuta—, baita 29 greba-egunen ondoren lortutako 2017-2021eko hitzarmeneko zenbait neurri ez aplikatzea eta 2023ko eta 2024ko greben ondoren adostutako soldata-igoerak atzeratzea ere.
EAEANk zein Auzitegi Gorenak legez kontrakotzat jo dituzte patronalen zenbait erabaki, eta hitzartutakoa betetzeko agindu diete. ELAk salatu du, hala ere, patronalek behin eta berriz erabiltzen dituztela auzitegiek jada baztertutako argudioak; esaterako, lan-baldintzen hobekuntzak Eusko Jaurlaritzaren finantzaketa handitzearen mende jartzea. Sindikatuak azaldu duenez, jardunbide horien ondorioz, hitzartutako hobekuntzak bi urte inguru atzeratu dira, eta horrek kalte egiten die bai langileen lan-eskubideei, bai ikasleei eskaintzen zaien arretari.