Zerbitzua garestitu arren sektoreko baldintzek okerrera egin dute
ELAk Eusko Jaurlaritzako Osasun Sailaren utzikeria salatzen du. Bizkaiko eta Arabako garraio sanitarioko larrialdietako kontratua laster iraungitzekoa da. Indarrean dagoen kontratua amaitzeko bi hilabete baino gutxiago geratzen da, baina ohiko lizitazio berririk ez da egin. Gainera, kontratuaren kostua bikoiztu den arren, lan baldintzak ez dira hobetu; zerbitzua linbo legal eta funtzionalera bultzatzen du.
Bizkaiko zerbitzua orain UTE BIZKANB-ek ematen du, eta Arabakoa Ambulancias Gipuzkoak; larrialdi kontratua 2026ko urtarrilean iraungiko da. Izan ere, lehenago zerbitzua esleitu zitzaion enpresa, La Pauk, baztertu egin zuten lan arriskuen prebentzioko hutsegite larriak egin zituelako; Lan Ikuskaritzak zigorrak ezarri zizkion horregatik. Ondorioz, Osasun Sailak UTE BIZKANB eta Ambulancias Gipuzkoa enpresei utzi die zerbitzua ematen, baina antzeko gabeziak konpondu gabe. Kezkatzekoa da hori, ez duelako jarraipenik eta kontratu publikoaren gaineko kontrolik egin. Ondorioz, lan baldintzak eta zerbitzua bera ez dira hobetu.
Administrazioak bere ardurari muzin egin izana eskandalu are handiagoa da alde ekonomikoari erreparatuz gero: Bizkaiko larrialdietakoa ez den Garraio Sanitarioaren urteko aurrekontua hazi da, 19,2 milioi euro izatetik egungo 37,6ak izateraino; aldiz, larrialdietako zerbitzua 25,2 milioi izatetik 35,5 milioiraino handitu da. Bizkaian izandako igoera guztira 28,8 milioi eurokoa izan da: aurreko aurrekontuaren ia bikoitza.
Gipuzkoan zerbitzua Ambulancias Gipuzkoak kudeatzen du, eta antzeko joera ikusi da: zerbitzuaren kostua % 25etik gora garestitu da azken hiru urteetan. Arabakoa iazkoa baino % 80 handiagoa da.
Alabaina, igoera horiek ez diete langileei eta zerbitzuari onik egin. Nahiz eta lan hitzarmenak lantaldearen subrogazioa bermatzen duen, beharginen prekarizazioa onartezina da. Ibilgailu flotaren egoera negargarria da; anbulantzia batzuek ez dute segurtasun eta operatibitate estandarrik betetzen. Arazoa ez da soilik garraio programatuarena; larrialdietan ere segurtasuna arriskuan dago, baita bizi-euskarri oinarrizko eta aurreratuen kasuan ere; hori mehatxu zuzena da gaixo eta profesionalentzat.
Horrenbestez, ELAk uste du kalitatezko zerbitzu efiziente eta iraunkorra ziurtatzeko modu bakarra publifikazioa dela; egungo lantaldeei osorik eutsi behar zaie, esaterako, Nafarroan duela gutxi egin zen bezala: emaitzak onak izan dira.
ELAk Osasun Sailari galdegin dio dagokion ardura har dezala bere gain eta lehenbailehen egin dezala zerbait. Premiazko erantzunik jaso ezean sindikatuak mobilizazioak deituko ditu eta beharrezkoak diren ekintza legalak garatuko ditu Bizkaiko garraio sanitarioko langileen eta kalitatearen alde.