Patronalak sindikatuen aldarrikapen guztiak errefusatu ditu

Gaur Bizkaiko metalaren negoziazioaren hamargarren bilera izan da. Hala ere, ez da aurrerapausorik eman, patronalak, FVEMek, sektoreko hitzarmenaren negoziazioa blokeatzen jarraitzen duelako. Patronalak atzera bota ditu aurreko bileran lau sindikatuek batera aurkeztutako aldarrikapen guztiak.

ELAren ustez, erantzun horrek agerian uzten du arazoa ez dela inoiz izan aldarrikapen sindikal komunik ez egotea, baizik eta patronalak lan baldintzak hobetzeko borondaterik ez izatea.

Sindikatuak azpimarratu du ez duela hitzarmenean atzerapenik onartuko, ezta akordiorik ere, KPItik gorako soldata igoerarik, jarduera guztien subrogaziorik, hitzarmena aplikatzeko bermerik eta lan baldintzen benetako hobekuntzarik jasotzen ez duenik.

Sindikatuak ohartarazi du negoziazioaren blokeoaren ondorioz, langileek erosahalmena galtzen jarraitzen dutela, eta patronalak denbora pasatzen utzi nahi duela langileak higatzeko.