ELAk bere sostengua ematen dio Nafarroako Gobernuaren ekitaldiari, polizia-indarren eta eskuin-muturreko taldeen biktimak omentzeko

Sindikatuak ongi deritzo biktima guztiak halakotzat hartzea politikaren eta herri-erakundeen aldetik, ezinbesteko baldintza baita, egia, justizia eta medeapen edo ordaintza bilatzeko bidean, eta gizartearen printzipioak bakean eta elkarbizitzan gero eta sakonago errotu daitezen.

Alde horretatik ELAk lehenagoko gobernuen injustizia azpimarratzen du, ez baitute onartu nahi izan polizia-bortizkeriaren biktimen ahaideen sufrimendua. Horregatik, egunotan zenbait alderdi politikok omenaldiarekiko erakusten duten betiko aurkako jarrera ez da batere lagungarria, sufrimendua eta memoria osotasunean hartzeko.