ELAk alegazioak aurkeztu ditu Bizkaiko erreforma fiskalak enpresei eta errenta altuei mesede egiten diela salatzeko

ELAk alegazioak aurkeztu dizkio 2026rako Bizkaiko zerga-neurriei buruzko Foru Arauaren proiektuari. Sindikatuak salatu duenez, Aldundiak enpresen, kapitalaren eta errenta altuen aldeko fiskalitatearen alde egin du berriro, zerga-sistema bidezkoago eta progresiboago baterantz egin beharrean.

Talentua erakartzeko, enpresen errotzea bultzatzeko eta inbertsioa sustatzeko argudioarekin, Aldundiak zerga-salbuespen eta -kenkari berriak proposatu ditu. Hauek dira neurri nagusiak:

• Onura fiskalak atzerritik datozen errenta handientzat: lan-etekinen salbuespena % 30etik % 50era igotzen da, eta % 60ra irits daiteke 36 urtetik beherakoentzat.

• Errenta handiagoei lotutako soldata-osagarri jakin batzuen tributazio txikiagoa: enpresarekiko loturagatiko eta produktibitateagatiko ordainsarien zati bat aurrezki-errenta gisa zergapetuko litzateke, tratamendu fiskal hobearekin.

• Kapitalarentzako zerga-abantaila berriak: % 30eko salbuespena ezartzen da enpresen transmisioari lotutako zenbait plusbalio eta dibidendutan, eta, gainera, etekinak handitzen dira ondarearen gaineko zergan.

• Zerbitzu pribatuetarako kenkariak: % 20ko kenkariak planteatzen dira mediku-aseguru pribatuengatik eta kirol-jarduerengatik, zerbitzu publikoak indartzeari lehentasuna eman beharrean.

• Pizgarri fiskalak etxebizitzako inbertsio pribatuarentzat: % 15eko kenkaria ezartzen da alokairuko etxebizitza-funts jakin batzuetan inbertitzeko, eremu horretan kapital pribatua sartzea erraztuz.

ELAk neurri horiek kentzea eta zerga-politika errotik aldatzea eskatu du. Horretarako, PFEZaren tipo maximoak handitzea, laneko eta kapitaleko errenten tributazioa parekatzea, enpresen mozkinen gaineko % 25eko tributazio eraginkorra ezartzea, ondare handiak eta herentzia handiak gehiago zergapetzea, eta iruzur fiskalaren aurkako borroka indartzea proposatzen du.

ELAren ustez, onartezina da gehien dutenen pribilegio fiskalak zabaltzen jarraitzea, kalitatezko zerbitzu publikoak bermatzeko baliabideak falta diren bitartean. Fiskalitateak aberastasuna banatzeko, desberdintasunak murrizteko eta eskubide sozialak finantzatzeko balio behar du, ez kapitalaren irabaziak handitzeko.