ELAk beste bi greba egunekin areagotu du Aldundiaren gaineko presioa

Gipuzkoako adinekoen egoitza eta eguneko zentroetako lan-gatazkak 242 greba-egun bete ditu dagoeneko, eta uztailaren 9an eta 10ean, ostegunean eta ostiralean, ELAk deitutako beste bi greba-egun izango dira. Sindikatuak Donostiako kaleetara eraman du protesta, eta mobilizazioa Gipuzkoako Foru Aldundiaren aurrean amaitu da, erakundeak gatazka desblokeatzeko duen "borondate politiko eta ekonomiko eza" salatzeko.

Mobilizazioa hitzarmenaren negoziazio-mahaia joan den astean blokeatuta geratu ondoren egin da. ELAren arabera, aldeek adostu zuten bilerak etetea proposamen berriak aurkeztu arte, orain arte mahai gainean jarritako edukiek akordioa lortzeko nahikoa oinarri eskaintzen ez dutela iritzita. Negoziazioa geldirik dagoenez, sektorearen arduradun den administrazio gisa, Aldundiari dagokio urrats bat egitea.

Gaur egun, greba mugagabean jarraitzen dute honako egoitza hauetako langileek: Zumarragako Argixao (Matia-Gerozerlan), Ordiziako San José (Zainen-Clece), Zumaiako San Juan (Clece), Sagrado Corazón (Eulen), Errenteriako Sanmarkosene (Gureak), baita Donostiako GSR-La Paz, Txara II (Biharko) eta Villa Sacramento (Domusvi/Mitie) egoitzetako langileek ere. Horiez gain, sektore osoan egindako greba-egunak ere batu behar dira.

ELAk, gainera, iragarri du bihar, ostirala, mobilizazio berri bat egingo duela Ordizian. Bertan, San José egoitzako egoera salatuko du, greban zegoen langile baten kaleratzearen ondoren.