ELAk 24 orduko greba deitu du azken aldiko kaleratzeak salatu eta paktua negoziatzen hasteko

ELAk 24 orduko greba deitu du LINSER LOG S.A.U. (RANDSTAD) enpresan datorren ostiralerako, urriak 31. LINSER LOG SAU enpresak eragiketa logistikoak kudeatzen ditu zortzi edo hamar lantokitan, besteak beste, BSH, Mitsubishi Logisnext (Nissan), Ucar Electrodos, Nuadi (Nucap), Valco Melton eta Mapsa lantokietan. Enpresa Batzordea bederatzi ordezkarik osatzen dute: lau CCOOk, lau ELAk eta bat UGTk. Deialdiak langile guztiei eragiten die, 130 pertsona inguru.

RANDSTAD multinazionalak LINSER LOG S.A.U. erosi zuenetik, enpresako zuzendaritzaren eta Enpresa Batzordearen arteko harremana eta komunikazioa nabarmen okertu dira. Gainera, banakako kaleratzeak eta hainbat lanpostu arriskuan jartzen dituzten ziurgabetasun egoerak gertatu dira. Azken hilabeteetan, enpresak BSHren zentroan lan egiten zuten zortzi pertsona kaleratu ditu, banakako kaleratze objektiboa aplikatuta, lan erreforman ezarritako lan egindako urte bakoitzeko 20 eguneko legezko gutxieneko kalte ordainarekin, ordezkaritza sindikalarekin aldez aurretik negoziatu gabe.

Lan baldintzak okertzeko arriskua ere badago, 2024tik ez baita enpresa ituna eguneratu. Horren ondorioz, soldatak izoztuta daude, eta bizitzaren kostua etengabe handituz doa.

Egoera honen aurrean, ELAk 24 orduko greba deitzea erabaki du, egoera salatzeko eta LINSER LOGeko zuzendaritzari enpleguaren egonkortasuna eta lan baldintzen hobekuntza bermatuko duten neurriak har ditzala eskatzeko.

ELAk grebara deitutako pertsona guztiei dei egin die beren eskubideen alde borroka dezaten, parte har dezaten eta mobilizazioak babes ditzaten.