Bizkaiko zahar etxeetan, berriro greban hasteko astebete falta da eta aurrerapausurik ez

2016/12/09
Bizkaiko zahar etxeetan, berriro greban hasteko astebete falta da eta aurrerapausurik ez
ELAk berriro salatu du patronalen eta Bizkaiko Foru Aldundiaren borondaterik eza, lan- eta gizarte-arloko gatazka hau konpontzeko. Hilaren 15ean, ostegunean, grebari ekingo diote berriro ere zahar-etxeetako langileek.

Aurreko greba amaitu zenetik ia hilabete bat igaro arren, egoera bertan geldirik dago, ELAk salatzen duenez, ez sektoreko patronalek, ez Bizkaiko Foru Aldundiak ez baitute ezer egiten gatazka onbideratzeko.

ELArentzat patronalaren jarrera oso argigarria eta kontsekuentea da; izan ere, ELAk Eguberritan greba-deialdia egitea “bihozgabea eta ankerra” da, patronalaren esanetan. Baina patronalak, bere aldetik, ez du batere borondaterik erakusten akordiorik lortzeko. Bestalde, ELAk ezin du sinetsi Foru Aldundiaren jarrera, sektoreko patronalen inmobilismoa babesten jarraitzen baitu. Ratioen gainean, esate baterako, ez du proposamen berririk egin, zeren aurrekoa ELAk zein senideek gaitzetsi zuten, oso urria zelakoan.

ELAk berriro agertzen du bere borondatea elkarrizketaren bidetik akordio egoki bat lortzeko; eta horrela, egoitzen egoera larria konponduz, Bizkaiko zahar etxeetako arreta-kalitatea bermatzeko.