Ez dago autogobernurik baldin eta hitzarmen sektorial nafarrak indargabetu edo beren eragina eragozten bada

2016/04/12
Ez dago autogobernurik baldin eta hitzarmen sektorial nafarrak indargabetu edo beren eragina eragozten bada
ELAk negoziazio kolektiboaren estatalizazioa salatu du gaur goizean Iruñean izandako agerraldi batean. UGT eta CCOO sindikatuek azken aldi honetan lan hitzarmenen estatalizazioa gauzatzeko bidean hainbat erabaki hartu dituzte: 2012ko ekainean CEN patronalarekin sinatu zuten "Lan-harreman, negoziazio kolektibo eta gatazken konponbide autonomorako ereduari buruzko Akorioa" honen lekuko da. Izan ere, honi esker erreformaren eduki atzerakoienak Nafarroan aplikatu dira. Mitxel Lakuntza eta Imanol Paskual, ELAko arduradunak Nafarroan parte hartu dute gaur goizean Iruñean izan den prentsaurrekoan.

ELAk uste du Nafarroako Gobernuak ez duela ezikusiarena egin behar langile-klasea eta, ondorioz, gure lurraldea pobretzeko estrategia honen aurrean. ELAk gogoratu nahi du aberastasuna banatzeko lagungarri izan litekeen tresna egokirik gabe autogobernua hutsala dela; ez dago autogobernurik negoziazio kolektiborik gabe; ez dago autogobernurik baldin eta hitzarmen sektorial nafarrak indargabetu edo beren eragina eragozten bada.

Halaber, kezkatuta salatu du sindikatuak Gobernuaren ardurapeko negoziazio kolektiboan dagoen blokeo egoera. Beren eremuan negoziazio kolektiboa ukatu egiten dute, horretarako sarri estatuko oinarrizko legediaren aitzakia baliatuaz (enplegu publiko eskaintzak, mahai orokorra, aparteko paga...)

Gainera, ELAk egitate bati buruz ohartarazi nahi du: aldaketa ez da bateragarria gobernuak elkarrizketa sozial delakoa iraunaraztea dakarten politikak erabakiz gero, esaterako Elkarrizketa Sozialeko Kontseilua eta beste hainbat mahai eratuaz.

Estatalizazioa bultzatzen duten eragile berberekin egindako ekinbide hauek ontzat ematea ez da ulergarria ikuspuntu demokratikotik edota autogobernuaren defentsarenetik; horregatik, ELAk exijitzen du Kontseilu hori eratzeko proposamena bertan behera gera dadila eta ekinbide politikoak has daitezela Nafarroan negoziazio kolektiboko eskubidea babesteko.