GIPUZKOAKO ERRESIDENTZIAK

ELAk proposamena aurkeztu du prekaritatearekin amaitzeko

2026/04/01
ELAk proposamena aurkeztu du prekaritatearekin amaitzeko
ELAk patronalei eta Aldundiari Gipuzkoako erresidentzien gatazka konpontzeko negoziazioa eskatu die. Proposamen bat aurkeztu die patronalei, Gipuzkoako LHK-CRLren bidez, eta Gipuzkoako Foru Aldundiari, egoitza eta eguneko zentroetako sektorean dagoen lan prekaritatea amaitu eta 140 egunetik gorako greba luzearen ondoren gatazkari irtenbidea emateko helburuarekin.

Proposamenak langileen aldarrikapen nagusiak jasotzen ditu eta egungo egoera gainditzeko neurriak planteatzen ditu. ELAk azpimarratu du gatazka luzatu egin dela negoziazio kolektiboan aurrerapauso esanguratsurik egon ez delako.

Azken negoziazio mahaia martxoaren 27an egin zen, hilabeteetako blokeoa gainditu ondoren. Bilera horretan, patronalek proposamen bat aurkeztu zuten, eta ELAren ustez, greben presioaren ondorioz aktibatu da negoziazioa. Hala ere, proposamenak ez du prekaritatea amaitzeko neurri eraginkorrik jasotzen, bereziki langileen ia erdiari eragiten dion lanaldi partzialtasunari dagokionez.

ELAk, halaber, planteatutako soldata igoerak eskasak direla salatu du, eta ez dator bat proposatutako hitzarmen berriaren oinarriarekin, azken hitzarmen estatutarioak erreferentzia izan behar direla defendatuz.

Gipuzkoako Foru Aldundiari gogorarazi dio sektoreko langileen ia erdiak lanaldi partzialeko kontratuak dituela, eta portzentaje hori %55era igotzen dela KABIA erakunde autonomoaren menpeko zentroetan, zeinen ardura zuzena Aldundiarena den. Halaber, urtean 10.000 eurotik gorako soldata arrakala dagoela salatu du.

ELAk Aldundiari eskatu dio apirilaren 23rako aurreikusitako hurrengo negoziazio mahaian parte har dezala, aurkeztutako proposamena eztabaidatu eta negoziazioari bide emateko, gatazkari irtenbidea bilatzeko asmoz.