AIRLAN - Alonsotegi

ELAk KPIaren gainetik %1,5eko soldata igoera eta 70 orduko lanaldi murrizketa duen hitzarmena sinatu du

2024/06/17
ELAk KPIaren gainetik %1,5eko soldata igoera eta 70 orduko lanaldi murrizketa duen hitzarmena sinatu du
Langileen antolaketa eta deitutako greba funtsezkoak izan dira hitzarmena lortzeko.

AIRLAN Alonsotegin dagoen enpresa da, 51 langile dituena. Klimatizazio sistemak fabrikatzen ditu.

Duela 4 urte, lehen enpresa hitzarmena sinatu zuten, metaleko hitzarmen sektorialak baino soldata igoera askoz handiagoekin, eta, besteak beste, klausula hauekin: inaplikazio klausula, ultraktibitatea eta errelebo kontratua eskubide gisa, betiere baldintzak betetzen badira.

Akordio berri hau, aurrekotik abiatzen da, eta hiru ardatz ditu, soldata igoerak, lanaldi murrizketa eta prekarietatearen aurkako neurriak:

  • 360 euroko soldata igoera lineala langile guztientzat.

  • KPIaren gainetik % 1,5eko soldata igoerak, indarraldiaren 4 urteetan.

  • 46 euro antzinatasunaren osagarri gisa.

  • Garbitegiko plusa.

  • Txandaka lan egiten dutenentzat atsedenaldiko 15 minutuak lan denbora gisa hartzea, lanaldia urtean 70 ordu inguru murriztuz.

  • Ergonomia plusa lanpostu jakin batzuetako egoera prekarioenak desagertu arte.

Hainbat negoziazio bilera egin dira enpresan, baina ez da aurrerapenik egin joan den ekainaren 3an batzarrak ekainerako 8 eguneko greba deialdia egitea erabaki zuen arte. Greba deialdiaren aurrean, enpresak langileen aldarrikapenak onartu ditu.