Denontzako kalitatezko justizia eta zerbitzu eraginkor baten aldeko manifestazioa izan da Bilbon

2013/01/31
Denontzako kalitatezko justizia eta zerbitzu eraginkor baten aldeko manifestazioa izan da Bilbon
EAEko Justiziako sindikatuek (ELA, CCOO, LAB, CSIF, UGT eta CGT), Justizia Ministerioak hartu dituen neurrien aurka elkarretaratu dira gaur arratsaldean Bilbon. Izan ere, nuerriok justizia zerbitzu publikoari eta herritar guztientzat berdintasunezko baldintzetan auzietara jotzeko eskubideari eraso egiten diote.

 

EAEko Justizia Administrazioko langileen ordezkaritza daukagun sindikatu orok, Justizia Ministerioa hartzen ari den neurrien aurka gaudela adierazi nahi dugu, ondoan zehazten ditugunei izugarri erasotzen dietelako: justizia zerbitzu publikoari; berdintasunezko baldintzetan herritar guztientzat auzietara jotzeko eskubideari; babes judizial eragingarria delako kontzeptuan gauzatzen den denontzako justiziari; horrezaz gain, inposizioan oinarrituriko eragozpena direlako gure erakundeek euren erabakiak har ditzaten.

Ildo horretan:

  1. 10/2012 Legearen (Tasen Legea) aurka gaude tasa judizialak ordaintzeko ahalmena duen gizarte zatiarentzat bakarrik eratzen duelako, gizartearen parte handiena – langabetuak, langileak, pentsiodunak...- euren interesak defendatzeko auzietara jotzeko aukerarik gabe uzten duela, tasak ordaindu ezinean.

  2. Justizia Administrazioak bankuak babesten dituela salatzen dugu; hain zuzen, haien demanden bitartez milaka herritar etxebizitzaren eskubide oinarrizkoaz gabetzen dituzten bankuak.

  3. Justizia Ministerioak Justizia Administrazioa erreformatzeko lege-proiektuak eratzerakoan eta izapidetzerakoan erabiltzen dituen obskurantismoa eta despotismoa ere salatzen ditugu, Justizia Administrazio zerbitzu publikoari egunez egun eusten dioten langileen ordezkariekiko eta profesionalen kidegoekiko negoziazioa erdeinatuz.

  4. Justizia Ministerioak proposaturiko Erregistro Zibilaren pribatizazioari aurre egiten diogu, egun ezinbesteko zerbitzu publikoa izanik, Justizia Administrazioko enplegatuek dohainik eskaintzen dituzten zerbitzuak ordaintzera behartuko lituzkelako herritarrak; eta, gauzatzekotan, erregistratzaileei eta notarioei irabazi ederrak ekarriko lizkiekelako.