ELAk hitzarmena lortu du, soldata eta euskararen arloko aurrerapenekin

ELAk akordioa sinatu du Galdakaoko kale-garbiketa zerbitzuko (UTE Andra Mari) 38 langileentzat. 2025-2028 aldirako hitzarmen kolektiboa izango dute, bi urteko negoziazio luzearen ondoren.

Lortutako aurrerapen nagusien artean, hitzarmenak KPIa bermatzen du, eta zerbitzu berriarekin lotutako % 2ko soldata-igoera jasotzen du, langileen erosteko ahalmenari eusteko.

Akordioak euskalduntzea sustatzeko neurriak ere jasotzen ditu. Hala, euskara ikasten duten langileek baimen ordainduak izango dituzte: Euskara ikasteko ordu bakoitzeko, lanaldiaren ordu erdi euskararen ikaskuntzara bideratuko da.

ELAk nabarmendu du neurri horrek aurrerapauso handia dakarrela euskararen sustapenean eta herritarren hizkuntza-eskubideen bermean, zerbitzu publikoa baita.
Sindikatuak espero du akordioa aitzindaria izatea eta antzeko neurriak beste udal batzuetara zabaltzea.

Hitzarmenak, gainera, parte-hartzearen arloko hobekuntzak ere jasotzen ditu, batzarrak egiteko ordu gehigarriak, hain zuzen ere.