Laugarren greba egunak ere jarraipen eta babes zabala izan du Bizkaiko autoeskoletan

2020ko urrian langileen ordezkarien ekimenez negoziazio-mahaia osatu zenetik, 2021eko maiatzera bitarte mahaiko 9 bilera egin genituen. Bilera horietan agerian geratu zen patronalak ez zuela proposamenik eta edukirik egiteko asmorik langileek hitzarmena berritzeko proposatutako funtsezko gaietan.

Proposamen eta eduki falta horren aurrean, mobilizazioen eta greben dinamikari ekitea erabaki genuen. Ekainak 8 eta 10eko lehen bi greba egunen ondoren ez genuen inolako proposamenik ez eta deirik ere jaso patronalaren aldetik. Ondorioz beste 3 greba egun deitu genituen (Uztailak 14, 23 eta 26rako).

Uztailaren 14an (hirugarren greba eguna) idazki bat erregistratu genuen APAVIren egoitzaren aurrean, zuzendaritza aukeratzeko hauteskunde atarian zuzendaritzari "Negoziazio erreala, zintzoa eta fede onekoa aktibatzeko" eskatuz, "Sektoreko langileen aldarrikapen nagusiei erantzungo dieten proposamenen bidez Bizkaiko autoeskolen hitzarmen berri bat lortzeko".

Uztailaren 28rako negoziazio-bilera baterako deialdia helarazi zigun patronalak herenegun. Deialdi hau uztailaren 23 eta 26rako deituta ditugun bi greba-egunen ondorenerako, eta, berriz ere, baloratzeko moduko proposamenik erantsi edo helarazi gabe gauzatu zuen. ELAk uztailaren 23ko grebaren hurrengo eguna baino lehen baloratu ahal izango dugun proposamen bat helarazteko eskatu arren, proposamenik ez zaigu iritsi.

Mobilizazioaren eta greben ondorioz, patronalak mugimenduak egin behar izan ditu, eta, ondorioz, mobilizazioen beharra eta eraginkortasuna berretsi behar ditugu; baina, gaur egun, badirudi gehiago saiatzen dela distrakzio maniobrak egiten, hala nola proposamenik gabeko bilera bat deitzea, edukiz hornitutako benetako negoziazioa aktibatzea baino.

Horregatik, proposamenik ez dagoen bitartean edo langileen eskaerei erantzuten ez dion bitartean, mobilizazio eta grebak bultzatzen jarraituko dugu. 11 urte daramate sektoreko langileek Hitzarmena berritu gabe, eta Hitzarmena berritzeko eskaera nagusiak hauek dira:

Soldaten erregularizaziorako eta erosteko ahalmena berreskuratzeko soldata-taulak ezartzea. Ia autoeskola guztiek, irakasleen kasuan, hitzarmenaren araberako soldata ofizialak modu irregularrean ordaintzen diren kopuruekin konbinatzen dituzte. Eta irakasle ez diren langileak, batez ere administrazioko langileak eta nagusiki emakumeak, urtean 1.000 euro gordinera ozta-ozta iristen dira.

• Lanaldia murriztea irakasle ez diren kolektiboentzat, generoen arteko aldea murrizteko. Urrats garrantzitsuak irakasleekin parekatzeko, asteko 35 orduei begira.
• Ordutegiak arrazionalizatzea, hauek gaueko 21: 00etatik aurrera luzatu daitezke sektore honetan, egunero 11 ordura arteko lanaldiekin eta larunbatetan lan egitea barne.
• Erretiro partziala bezalako neurriak, adina arrisku-faktore izan daitekeen sektore batean plantila gaztetzea ahalbidetuko dutenak.