Gipuzkoako erresidentzia, eguneko-egoitza eta gizarte ekintzako langileak, euren eskubideen alde

2015/12/11
Gipuzkoako erresidentzia, eguneko-egoitza eta gizarte ekintzako langileak, euren eskubideen alde
Gipuzkoako erresidentzia, eguneko-egoitza eta gizarte ekintzako langileek mobilizazioa egin dute gaur eguerdian Gipuzkoako Foru Aldundiaren egoitzaren aurrean. ELAk salatu nahi duenez gaur gaurkoz Gizarte Politikaren Sailaren menpeko sektoreetako negoziazio kolektiboa blokeaturik dago. Zentzu honetan, ELAk berretsi nahi du ez duela inolako atzerapausorik onartuko sektore hauetako langileen eskubideetan.

Bilkuraren ostean ELAko arduradun Iñigo Zubeldiak honako agiria irakurri du:

  • Irailaren 2an ELAk bilera egiteko eskatu zion Gizarte Politikako ahaldunari, legegintzaldi honetan haren ardurapeko sailaren ildoak ezagutzeko (negoziazio kolektiboa, enplegua…). Gaurko egunean, 3 hilabete geroago, ez dugu oraindik erantzunik jaso.

  • Negoziazio kolektiboa erabat blokeaturik dago, eta GFAk Villabona eta Elgoibarko egoitzetarako egin duen Kabiaren lizitazioan, lan-baldintzei dagokienez tarifetan %5eko defizita dago, alegia, aipaturiko egoitzetan 2016. urtean aplikatu beharreko tarifetan. Baldintza-orrietan Kudeaketa Integral Pribatuaren eredua finkatu da, ez dago benetako kontrol eraginkorrik, eta aipaturiko egoitzetako plantillen gutxieneko bermeko hitzarmen aplikagarria 2005-2008koa izango da, eta ez azken akordio edo hitzarmena.

  • Gipuzkoako Gizartegintzaren II. Hitzarmenaren negoziazioa ito-puntutik ateratzeko Gipuzkoako Foru Aldundiak eman behar duen eta ematen ez duen bultzada garrantzitsua salatu nahi dugu.

  • Horrekin batera, 2016. urterako ez dago aurrekontu-sailik; beraz, ez dago bermerik sektore guztietako lan-baldintzak modu normalizatuan aplikatzeko. Gainera, ez dago GFAren konpromiso politiko argirik, Gipuzkoako Egoitzetako sektorearen 2015eko apirilaren 26ko proposamenaren puntuak betetze aldera.

ELAkideok urte asko daramagu borrokan Gipuzkoako sektoreetatik lan-prekarietatea ezabatzeko. Beraz, ez dugu onartuko pausorik atzera; ezta GFAk, bere ardurei uko eginez, diru publikoa interes eta negozio pribatuaren zerbitzura jartzerik ere

ELAtik galdatzen diogu Gipuzkoako Foru Aldundiari:

1.- Villabonako eta Elgoibarko egoitzetarako KABIAren baldintza-orriak erretiratzea.

2.- Berariazko aurrekontu-sail nahikoaz hornitzea, Gipuzkoako Egoitzetako langileen akordio blindatuak GFAk betearazi ditzan. 

3.- Gizarte Politikaren Sailak zuzenean esku hartzea Gizartegintzaren II. Hitzarmen Kolektiboaren negoziazioan. Eta aurrekontu-sail nahikoaz hornitzea, eta aipaturiko hitzarmenean erreformaren aurkako klausulak sartzera bultzatzea. 

4.- Gizarte Politikaren Sailak aurrekontu-sail nahikoaz hornitzea, eta bere jardute-eremuko langileen lan-baldintzak hobetzera bultzatzea.