50 urte: Gu eraldatu, mundua aldatzeko

Datorren uztailaren 3an, Eibarren, ELAk ospatuko du bere azken 50 urteetako ibilbidea. 1976an, frankismotik ateratzeko atakan, sindikatuak bere 3.kongresua egin zuen, bi saio ezberdinetan: abuztuan, Eubako San Gabriel eskola zaharrean (Zornotza), eta urrian Eibarko Astelena frontoian. Orduan, ELAk onartu zituen bere printzipioak, eta horrekin batera berreraiki zuen 2. Errepublikatik zetorren eraitsitako zubia.

Adierazpen hura bere garaian sindikatuaren sorrera-aktaren eta lehen estatutuen (1911) berrikuspena izan zen, gaur egun oraindik ere ELA definitzen duten funtsezko ezaugarriak ezarriz: euskal sindikatu abertzalea, sozialista, independentea eta bere afiliazioaren bidez finantzatua. Gogoratu behar da iaz, 16. kongresuan, ELAk euren printzipioak eguneratu zituen, 50.urteurrena aurreratuz.

Aurten, aldiz, ELAk ekitaldi berezia antolatuko du Eibarren uztailaren 3an, lelo esanguratsupean: ‘Oinarri sendoak etorkizunerako’ (‘50 años de transformación y lucha’). Horretarako, 1976ko irudi historikoa berreskuratu da (orduko kongresuen iruditeria Jose Luis Zumetak eta Joxean Artzek diseinatu zuten), baina eguneratu da gaur egungo ikurrak eta koloreak baliatuz.

Eibarko Koliseoan egingo den ekitaldian, 1977tik gaurdaino afiliatuak izaten jarraitzen direnei omenaldia eskainiko zaie, eta azken 50 urteko historia errepasatuko da, dokumental baten bitartez, eta Mitxel Lakuntza, Amaia Muñoa eta Leire Txakartegiren hitzaldiekin.

Ekitaldi honek azpimarratu nahi du 50 urte hauetan, ELAk bere bilakaera egin duela, beti ere mundua aldatzeko. Sindikatua ere aldatu da, gaur egun 50.000 emakume baino gehiago afiliatuta daude ELArekin, eta migratuen artean sindikatuaren presentzia gero eta handiagoa da. ELA aspalditik kontsolidatu zen lehen sindikatu gisa (% 36ko ordezkaritza dauka EAEn eta Nafarroan): Hego Euskal Herriko eskualde guztietan presentzia homogeneoa duen euskal erakunde bakarra da.

Urte aunitzetarako!