ELAk antzinatasun-baimenak berreskuratzea eskatzen du

ELA sindikatuak idazki bat aurkeztu du gaur Eusko Jaurlaritzan Ertzaintzaren gaineko epaia euskal administrazioko langile guztiei hedatzeko. Bilboko Administrazioarekiko Auzietako 6 zk.ko Epaitegiaren epaian honela esaten da “20/2012 ELDaren 8.1 eta 2 artikuluaren bidez aldaturiko EPOE/EBEParen 48 eta 50 artikuluak (eta beraz, hortik eratorritako autonomietako arauak) ezin dira aplikatu atzera eraginez; beraz, ezin izango dituzte eraginpean hartu Ertzaintzaren zerbitzuan 15 urte bete dituzten langileak, dagozkien opor-egun gehigarriak hartzeko eskubidea sorrarazia baitute”. Hori dela-eta, 2012ko uztailaren 15ean lortuta zeuden antzinatasun-egunak hartzeko aukera ematen zaie ertzainei.

ELAtik azpimarratu nahi dugu Eusko Jaurlaritzak, beste hainbat murrizketaren artean, aipaturiko antzinatasun-baimenak (“kaskazuriak” izenaz ezagunak) kendu zituela, Enplegatu Publikoaren Oinarrizko Estatutuaren 48 eta 50 artikuluak aldatu baitziren Aurrekontuen Egonkortasuna Bermatzeko eta Lehiakortasuna Sustatzeko Neurriei buruzko uztailaren 13ko 20/2012 ELDaren 8.1 eta 2 artikuluaren bidez, eta hori EAEn aplikagarria izango zelakoan.  Antzinatasun-egunetako baimena kentzeko argudioa neurrien oinarrizko izaera izan zen, baina orain epaiak baliogabetu egin du orduko argudioa.

ELAtik premiatu egiten dugu berriro Jaurlaritza, murrizketa-politikak zeharo aldatzera, besteak beste, lanaldia luzatzearena eta lan-eskubideak murriztearena (Aldi Baterako Ezintasuneko egoera, hartzeko egunak, ekonomikoak...). Horrelako neurriak lagungarriak izan dira lanpostuak galtzeko, lan-baldintzak lorrintzeko, eta EAEko zerbitzu publikoak okerragotzeko. Horregatik, 2010. urteko Mahai Orokorraren Akordioa osotasunean betetzea eskatzen dugu beste behin.