Abenduaren 13tik 17ra, Bizkaiko autoeskoletako greba txanda berria

2021/11/30

ELAk beste bost greba-egun deitu ditu Bizkaiko autoeskoletan abenduaren 13, 14, 15, 16 eta 17rako, sindikatuaren azken hitzarmen-proposamenari patronalak erantzunik eman ez diolako. Era berean, ELAk negoziazio mahaiaren bilera deitu du abenduaren 9rako LHKren egoitzan eta gatazka bideratzeko proposamen berri batekin joateko eskatu dio patronalari.

Bizkaiko autoeskolek 11 urte daramatzate hitzarmena berritu gabe. Soldatak, ordutegiak eta gainerako lan-baldintzak oso prekarioak dira, eta, kasu askotan, irregularrak. Gainera, genero-arrakala handia dago administrazio-postu feminizatuenetan.

APAVIk negoziatzeko borondaterik ez zuenez izan, ekainetik azarora, langileek 19 greba egun egin dituzte sektoreko lan-baldintzak erregularizatu, duindu eta hobetuko dituen hitzarmen baten alde. Hala ere, patronalak oraindik ez die erantzun langileen eskaerei.

Langileek soldata-taulak eta erosteko ahalmena berreskuratzea, irakasleak ez diren kolektiboentzako lanaldia murriztea (genero-arrakala murrizteko), ordutegiak arrazionalizatzea eta plantilla gaztetzeko neurriak eskatzen dituzte, besteak beste.