Azpikontratetan lan baldintzak hobetzeko Herri Ekimenaren alde mobilizatzen jarraituko du ELAk

2015/12/16

Abenduaren 4an Eusko Legebiltzarreko Ogasun batzordea bildu zen; ELAk bertan parte hartu zuen, 110.000 sinadurak babestutako Herritar Legegintza-Ekimenaren (HLE) bultzatzailea izan delako. Batzordean entzun zena entzunda, ELAren ondorioa argia da: HLEa ez da aurrera aterako. Izan ere, ekimen honek gaur-gaurkoz soilik EH Bilduren babesa baino ez du. ELAren esanetan batzordean Herri Ekimenaren aurka erabilitako argudioak lotsagarriak izan ziren.

Hain zuzen, herri ekimen honen nondik norakoak aztertzeko ELAk agerraldi publikoa egin du gaur goizean. Bertan idazkari nagusia –Adolfo Muñoz, Txiki– eta negoziazio kolektiboko arduraduna –Joseba Villarreak– izan dira. Muñozek duela bi urte azpikontratetako langileen lan baldintza hobetzeko ELAk Eusko Legebiltzarrean aurkeztutako Herritar Legegintza-Ekimenak jasan duen errespetu eza salatu du. “Azpikontratetan egiten ari diren doikuntza eta murrizketak Eusko Jaurlaritzak egiten dituen murrizketa isilen parte dira”.

ELAren esanetan Herri Ekimenaren aurka Eusko Legebiltzarrean erabilitako argudioak lotsagarriak izan ziren."Ekimenaren bultzatzailea deskalifikatzen saiatzen ari diren taldeek ez dute nahi inork agerian uzterik euren jarrera, hau da, patronalaren eta murrizketen alde duten jarrera lotsagarria”.

ELAk Ekimen bidez subrogazio-eskubidea eskatzen dugu (hau da, langileak bere lanpostuan eta baldintzetan jarraitzea, nahiz eta enpresa azpikontratatuaz aldatu), lantokitik hurbilen dagoen hitzarmena aplikatzea (hau da, hemengo hitzarmenak aplikatzea), eta puntu horiek betetzen ez dituenari zigorra ezartzea, zerbitzu azpikontratatua kentzea ere barne.