Nafarroako Osasuneko Mahai Sektoriala

ELA Osasunari buruzko Foru Legearen aurka agertu da, ez baitio aterik ixten pribatizazioari

2026/02/27
ELA Osasunari buruzko Foru Legearen aurka agertu da, ez baitio aterik ixten pribatizazioari
Sindikatuaren ustez, Osasunari buruzko Foru Lege berriaren aurreproiektuak ez dio hobekuntzarik ekarriko herritarrei, zerbitzu publikoei zein langileei.

Sindikatuen eta gizartearen gaitzespenaren ondorioz, Osasuneko Departamentuak uko egin dio Osasunbidea eta NOPLOI enpresa-erakunde publiko bihurtzeari. ELAk positibotzat jo du kontzeptu hori desagertu izana.

Hala ere, aurreproiektu berriaren idazketak aurreikusten duenez, "Nafarroako Gobernuak Osasunbidea Nafarroako Osasun Zerbitzuaren eta Nafarroako Osasun Publikoaren eta Lan Osasunaren Institutuaren estatutuak egokituko ditu, kudeaketa-autonomia zabalena emanez, Osasunari buruzko Foru Legean ezarritako gobernantzaren, langileen politikaren eta kudeaketa-autonomiaren eredua erabat garatzen dela bermatzeko".

Ondorioz, sindikatuak uste du ez dela aldatu Osasun Departamentuaren funtsezko planteamendua. Izena bakarrik kendu du, baina enpresa-erakunde publikoa balitz organismoak izango lukeen autonomia eman nahi du.

Are gehiago, Osasunari buruzko Foru Lege berriak honako hauek ahalbidetuko ditu:

  • Langileak aldi baterako zentro batetik bestera mugitzea.

  • Ekimen pribatuari atea zabalik uzten dio, saiatu beharrean legez saihesten zerbitzuak pribatuan ematea.

  • Ez da bermatzen osasun publikorako sarbide unibertsala, eta ez da handitzen odontologia, fisioterapia edo oftalmologia bezalako zerbitzuen zerrenda.

  • Arreta euskaraz jasotzeko eskubidea ez da blindatzen.

  • Ez da neurririk ezarri plantilla ELGAren batez bestekora arte handitzeko, ez egonkortzeko 3 urte baino gehiago daramatzatenak, ez eta behin-behinekotasuna murrizteko beste neurririk ere.

  • Ez du itxaron-zerrendak nabarmen murrizteko neurririk ezartzen, eta gaur egun zerrendei buruz ematen diren datuak ez dira behar bezain gardenak eta publikoak.

  • Sektore soziosanitarioa eta garraio sanitarioa publiko egitea ere ez du aurreikusten.

Horregatik guztiagatik, ELA Osasunari buruzko Foru Lege berriaren aurka agertu da, gainerako sindikatuak bezala, LAB eta UGT izan ezik, eta Nafarroako Gobernuari eskatu dio Lege Aurreproiektua berriz aztertzeko eta herritarren eta langileen beharrei erantzungo dien bat aurkezteko.