ELAk irakasleak finkatzeko prozesu nahikoa eta bermatzailea negoziatzeko eskatu dio Hezkuntzari

2021/12/20
Mahai sektorialaren azken bileran, ELAk Hezkuntza Sailari berriro eskatu dio sindikatuekin negoziatzeko irakasleen artean dagoen behin-behinekotasunari irtenbidea emango dioten prozesu bermatzaileak.

Hezkuntza Sailak 2022rako maisu-maistren lan-eskaintza publikoaren deialdiaren azken zirriborroa erretiratuko duela iragarri du. Dirudienez, Ministerioarekin egingo duten bilera da horren arrazoia, Ministerioak deituta, sektorean behin-behinekotasuna murrizteko ezohiko egonkortze-prozesuak abian jartzeko aukerak aztertzeko.

ELAk irakasleekiko erantzukizunez eta errespetuz jokatzeko eta oposizioak prestatzen ari diren langileengan nahasmena eta ziurgabetasuna sustatzen ez jarraitzeko eskatu dio Eusko Jaurlaritzari.

ELAk kritikatu du LEPen deialdien azken zirriborroetan ez direla sindikatuaren aldarrikapenak jaso: ez da aurreikusten plaza kopuru nahikorik, ezta irakasleen kontsolidazioa bermatzeko prozedura bermatzailerik ere. Gainera, estatu mailako arau-aldaketen testuinguruan, kontsolidazioari eragin diezaioketenak.

Bigarren Hezkuntzako eta Lanbide Heziketako azken LEPa, oraindik amaitu gabe dagoena, etengabeko aldaketa eta atzerapenek markatu dute. Pandemiaren ezohiko egoerak ulergarri egin ditzakeen gorabeherez gain, hezkuntza sailaren kudeaketa kaskarrak eta erabakien aldaketak zerikusi handia izan dute.


Deialdi hori kidego horietako irakasleen kontsolidazioa bermatzeko prozesurik kontuan hartu edo negoziatu gabe ere egin zen.