Nafarroako osasun eskolan espazio arazo larriek jarraitzen dute

NUPeko medikuntza fakultate berriaren inaugurazioa albiste ona da, komunitate honek hainbat hamarkadatan espero zuena. Eraikin berri horrek instalazio modernoak emango dizkio Nafarroako osasun-prestakuntzari, aurretik eraikitako erizaintza-instalazioarekin batera.

Hala ere, badira urte asko Nafarroako Osasun Eskola Tekniko Profesionalak (NOETPk) ere espazio-arazo larriak dituela, Lanbide Heziketan osasun-arloko Estatuko erreferente baten funtzionamendu normala izugarri mugatuz. Eskola honek bere instalazioak handitu eta modernizatu behar ditu bere zikloak eskaintzen jarraitu ahal izateko edo eskaintza bera handitu ahal izateko, eta dagoen inguru berean egin beharko luke, Nafarroako Ospitale Gunean bertan, fakultatearekin egin den bezala.

ELA sindikatuak eskatu du medikuntzako eraikin berriarekin libre gera daitezkeen espazioak kontuan hartzea edo esparru berean eskola berri bat eraikitzea, 2011tik eskatzen baitute, eta instalazio berriak erabiltzea hori egiten den bitartean. Ez da onargarria Hezkuntza Departamentua Nafarroako Lanbide Heziketaz harrotasunez mintzatzea etengabe eta aldi berean erreferentziazko ikastetxe bat ez zaintzea, Gobernuak inolako zailtasunik izan ez duen bitartean medikuntzako karrerarako horrelako eraikuntza bat altxatzeko.

Hainbat hamarkadatan osasun-eskolak egin duen lan handiari justizia egin behar zaio. Osasun-teknikariak bikain prestatu ditu eta askotan ere etorkizuneko unibertsitate-graduatuak izango zirenentzako tarteko zubia izan da ere. Egindako lan handi hori bere maila akademikoarekin bat datozen azpiegituretan islatu behar da. Ez dugu onartuko Lanbide Heziketa gutxiestea 20 metro baino gutxiagora dauden beste ikasketa batzuen aldean.