Hezkuntza Saila eta EHUren zentroetako azpikontratatutako garbitzaileek euren hitzarmenaren negoziazioa abian jartzea exijitzen dute

2020/01/23

Hezkuntza Sailaren eta EHUren menpeko zentroetan azpikontratatutako garbiketako langileek elkarretaratzea egin dute Leioako Campuseko sarreraren aurrean, duela bost urte baino gehiagotik blokeatuta dagoen hitzarmenaren negoziazioa martxan jarri dadin. ELAk, UGTk, LABek, ESK-k eta CCOOk salatu dutenez patronalak ez du proposamen bat aurkezteko konpromisoa betetzen, eta ez da agertu ere egin hitzartutako azken bilerara. "Badirudi behin betiko negoziazio mahaia hausteko hautua egin dutela", baieztatu dute.

Aldarrikapenei dagokienez, urtean 2.200 eurokoa den lanaldi plusaren ordainketa eskatzen dute, hau da, EHUren plantillan diren garbitzaileek kobratzen duten plus bera. Teorian enpresek eta Eusko Jaurlaritzak ekiparazio hori eman behar dela onartzen badute ere, praktikan enpresek ordaintzeari uko egiten diote, soldata igoerak gauzatzeko marjina ez dutela argudiatuta, nahiz eta langileen kontratuak berrizterakoan a la baja egin duten.

Salatu dutenez, momentu honetan 2019ko igoera ere ez dute eskaintzen (2,25%-2,5%). Lan kargak, ordea, handitu dizkiete. “Euren poltsikoak betetzen ari dira gure esfortzuari esker eta gure duintasuna zapalduz”.

Gauzak horrela, ELA, UGT, LAB, ESK eta CCOOek mobilizazio berriak egingo dituztela iragarri dute. Enpresek negoziazio seriori muzin egiten jarraitzen badute, greba egiteko aukera ere mahai gainean dela baieztatu dute.