ELAk bat egingo du du mugimendu feministak abenduaren 13rako deitutako mobilizazioarekin
Abenduaren 13an, 12:20ean, mugimendu feministak manifestazioa deitu du Gasteizen, `Zaintzak gureak publikoak komunitarioak eta guztionak, zuena pribatizatua eta negozioa´ lelopean.
ELAk bat egin du deialdiarekin, eta gogorarazi du zaintzaren sektorearen zati handi bat pribatizatuta dagoela, eta prekarizazioa, partzialtasuna eta, oro har, lan baldintza txarrak direla nagusi. Administrazio publikoetan, behin-behinekotasun-tasak altua izaten jarraitzen du, eta ez da aurrera egin lan osasunaren prebentzioan.
ELAk nabarmendu du egoerak arduradun zehatzak dituela: Arabako Aldundia eta pribatizazioak bultzatzen dituzten udalak. "Araban, Euskal Herrian bezala, alderdi politikoek zaintza lanak pribatizatzearen alde egin dute, eta ondorioz, kontrolik gabeko negozio bat baimentzearen alde. Patronalek onura ekonomikoa bilatzen dute, langileen lan baldintzak okertzen diren bitartean. Eta herri administrazioek ez dituzte behar adina aurrekontu eta baliabide bideratzen ", deitoratu du.
Une honetan, Araban, ELA hitzarmenak negoziatzen ari da pribatizatutako 4 sektore nagusietan: egoitzak, esku-hartze soziala, Etxez Etxeko Laguntza eta desgaitasuna. Eta lau negoziazioetan egoera bera errepikatzen dela deitoratu du: administrazio publikoen eta patronalen arteko akordioa, lan baldintzak ez hobetzeko.
Ildo horretan, adibide gisa, ELAri "onartezina" iruditzen zaio erresidentzien egoera. Izan ere, 6 urte eta 50 greba egun baino gehiagoren ondoren, Estatuko hitzarmena aplikatzen jarraitzen baita. Sektore publikoan ere mobilizazioak daude Araban, besteak beste, Gizarte Ongizaterako Foru Erakundean dagoen borroka.
ELAk uste du urratsak eman behar direla zaintza lanak publifikatzeko, eta adierazi du horrek zerikusia izan behar duela lan baldintzak hobetzearekin. Langileen lan-baldintzak hobetu behar dira, sektore publikoan eta sektore pribatizatuetan.
Hori lortzeko, ELAk uste du beharrezkoa dela mobilizazioa eta interpelazioa. Horregatik, Aldundiari eta udalak zuzenean interpelatu ditu. Izan ere, udalek dute etxez etxeko zerbitzuaren eskumena, eta udal askotan pribatizatuta dago.
Ildo horretan, ELAk babestu egingo du mugimendu feministak abenduaren 13rako deitu duen manifestazioa. Gauzak horrela, 12:20etik aurrera Gasteizko Plaza Berritik abiatuko den mobilizazioan parte hartzeko deia egin du.