Mercedeseko zuzendaritzak hitzarmenaren negoziazioa geldiarazi du
Zuzendaritzak gaur helarazi die erabakia sindikatuei, 27. negoziazio-bileran. Gogoratu beharra dago Ingo Ettischer Vanseko Estrategia arduradunak malgutasuna eta soldata-igoerak egungo testuinguruaren eta enpresaren irabazien oso azpitik jasotzen zituen proposamena egin zuela orain dela bost egun. Gaur, berriz, zuzendaritzak alde bakarrez negoziazioa gelditzea erabaki du. ELAren iritziz onartezina da negoziazioan norabide aldaketak egitea eta enpresa bere postaren bidez langileekin komunikatzea, langileen ordezkaritzaren bitartez izan beharrean. "Ezin da onartu enpresak erritmoak markatzea eta aldebakarreko erreferenduma noiz deituko duen mehatxupean bizitzea, negoziazio kolektibo demokratikoaren arauak urratuz", deitoratu dute.
Sindikatuak eskatu du benetako negoziazioari ekitea eta soldata-igoerak, malgutasunaren mugak eta enplegu-bermeak barne hartuko dituen edukiak bermatzea.