Aurtengo Martxoak 8an ere emakumeok* greba egingo dugu gure lanpostuetan eta etxeetan!

Aurten, iazko olatua hartu eta urrats bat gehiago emango dugu 24 orduko greba feminista eginez.

• Emakumerik* gabe mundu honek ez duela funtzionatzen irudikatuko dugu.
  Sistema kapitalista, heteropatriarkala eta arrazista auzitan jarriko dugu.
  Enplegu formaletik haratago doan greba egingo dugu, baina dudarik gabe, soldatapeko lan munduan ere badugu zer aldarrikatu eta borrokatu egun horretan.
• Martxoaren 8a eguneroko gatazka eta borroken bitartez eraiki eta elikatuko dugu ELAn, bizimodu duinagoen alde emakumeak egunero ari baikara antolatzen lan munduan.

Bide horretan, sindikatua emakumeak ahalduntzeko tresna dela aldarrikatu nahi dugu. Ikusi besterik ez dago azken urteetan nola areagotu diren emakumeen gatazka eta borrokak hainbat esparrutan: erresidentzietan, garbikuntzan, haurreskoletan, etxez-etxeko laguntzan, hoteletan, ostalaritzan...

Martxoaren 8an ere borroka sindikala eta feminista elkartuko ditugu, prekarietate egoera ezberdinetan dauden emakumeak batuz eta emakumeon arteko elkartasuna sendotuz.

Zergatik aterako gara grebara? Milaka arrazoi daude:

• Enplegu eta bizitza duinen alde...
• Prekarietatearen eta pobreziaren feminizazioaren aurka: lanaldi partzialak; behin-behinekotasuna; soldata arrakala; miseriazko pentsioak; kristalezko sabaia...
• Kalitatezko zaintzarako zerbitzu publiko, unibertsal eta doakoen alde. Era berean, zaintza gizonen ardura ere badela aldarrikatzeko...
• Indarkeria sexistaren eta eguneroko jarrera eta ekintza matxisten aurka...
• Lan merkatu formaletik at geratzen diren emakume langile guztien eskubideen alde...
  ...

Euskal Herriko Mugimendu feministaren manifestua