Bilbo #FeministonHerria izango da urriaren 27an

2018/10/25
Urriaren 22an Emakumeon Mundu Martxaren XI. nazioarteko topaketak hasi ziren Bilbon. Aste osoan zehar hamaika ekimen egongo dira, baina hitzordu nagusia urriaren 27an Bilboko Areatzan egingo den Feministon Herria izango da; bertan egun Euskal Herrian Martxan dauden proiektu feminista ezberdinak ezagutzeko aukera egongo da. Gainera, Emakumeen Mundu Martxaren nazioarteko topaketa hauetan izango diren 42 herrialdeetako emakumeek ere protagonismo berezia izango dute.

Feministon Herria 10:00tan hasiko da gosari feminista batekin, eta egun osoan zehar luzatuko da. Besteak beste hitzaldiak, mahai-inguruak, performanceak, azoka, herri-bazkaria, manifestazioa edo kontzertuak egongo dira.

ELAko berdintasun arduradun Jone Bengoetxeak azpimarratzen duenez, Feministon Herria Emakumeen Mundu Martxaren baitan erakunde feministak garatzen ari diren alternatiba eta erresistentziak erakusteko leku aproposa da: indarkeria transistemikoak; bizitzaren jasangarritasuna; gorputzak eta sexualitateak; eta sarean egindako lana eta dibertsitatearen kudeaketa.

“Herri feminista bat eraikitzeko prozesua zerbait kolektiboa da. Bakoitzaren gauza da, Euskal Herriko zein beste lurralde batzuetako mugimendu feministarena eta sistema kapitalista, hetereopatriarkal, arrazista eta kolonial honen aurka eusten ari diren mugimenduena. Ekimen honen leloak dion bezala gure aurrekoek hasi zuten bidean elkarrekin goaz urruti heldu nahi dugulako, gure lurraldeen eta gorputzen soberania izateraino, alegia”.

Informazio gehiago