Sexu erasoa jasan zuen langile bati ezintasun iraunkor absolutua aitortu diote

Iruñeko Lan Arloko 2. Epaitegiak lan istripuaren ondoriozko ezintasun iraunkor absolutua aitortu dio Nafarroako Ospitale Unibertsitarioan sexu erasoa jasan zuen langile bati. Catering Arcasa SL enpresako sukaldeko laguntzailea zen ospitaleko kafetegian lanean ari zela. 2022ko irailaren 1eko gauean ospitalera sartu zen pertsona batek egin zion sexu erasoa.

ELAko Lan Osasunaren sustapenerako Bidelagun Fundazioaren zerbitzu juridikoek bultzatutako epaiak frogatutzat jotzen du langileak estres post-traumatikoko nahasmendua eta ondorio psikologiko larriak dituela, eta horiek erabat baliogabetzen dutela bere lanerako gaitasuna. Epaiaren arabera, erasoa gertatu zenetik tratamendu psikologikoa eta farmakologikoa jaso badu ere, muga funtzionalak ditu.

Epaileak ondorioztatu du langileak ezin duela inolako lanik normaltasunez egin, eta oinarri arautzailearen %100eko prestazioa aitortu dio.

Aurretik emandako beste ebazpen batean, epaitegi berak Catering Arcasa eta Osasunbidea zigortu zituen prestazioetan %30eko errekargua ordaintzera, prebentzio neurri nahikorik ez hartzeagatik.

ELAk eta Bidelagun Fundazioak epai hau biktimarentzako aitortza gisa baloratu dute, eta kritikatu dute INSSk hasieran ezintasun eskaera administrazio bidean ukatu izana; izan ere, horrek epaitegietara jotzera behartu zuen langilea, eta horrek birbiktimizazioa eragin zion, txosten medikuek jaso bezala.

Sexu erasoa lan eremuko indarkeria matxistaren adierazpen larrienetako bat izanik, epai honek garrantzi berezia hartzen du. Enpresen utzikeria agerian uzteaz gain, erreferentziazko aurrekari bat ezartzen du erasoak pairatu dituzten emakumeentzat.