ELAk plaza gehiago eskatu ditu Eusko Jaurlaritzaren Hezkuntzako LEPean, sukalde eta garbikuntzako langileak kontsolidatzeko
ELAk ekarpenak aurkeztuko dizkio Eusko Jaurlaritzaren Hezkuntzako LEParen oinarrien proposamenari, sukaldaritzako eta garbikuntzako langileak kontsolidatzeko. Sindikatuak azpimarratu du, benetako kontsolidazioa egon dadin, ezinbestekoa dela plazak gehiago izatea eta oinarriak hobetzea. Sindikatuaren helburua argia da: gaur egun sektore honetan lan egiten duten pertsonak kontsolidatuko direla bermatzea. Horretarako, ELAk uste du egokiena dela Hezkuntza Publikoko eskoletan sukaldari eta garbitzaile lanetan egindako denboran/esperientzian zentratzea, aldagai horiei ahalik eta pisu erreal handiena emanez. ELAk adierazi du abenduaren 1erako deituta dagoen hurrengo negoziazio mahaian bere ekarpenak kontuan hartzen ez badira, mobilizazioekin eta grebekin jarraituko duela.
ELAk LEPari egindako ekarpenak:
- PLAZAK:
- Prozesu osoan zehar, ELAk 520 plaza inguru eskatu ditu, eskura jarri zaizkion datu eta dokumentu urriekin egindako azterketatik abiatuta. Gaur egun eskaintzen ari diren 465 plaza horien kopurua handitu egin liteke, eta handitu egin beharko litzateke, prozesua bermatzaileagoa izatea ahalbidetuko lukeelako.
OINARRIAK: - Hezkuntza Sailak azaroaren 17an egindako oinarri proposamenetik abiatuta, ELAk beharrezkotzat jo du bi baremazio berrikustea:
Esperientziako puntuen %60 eta merezimenduetako %40: Oinarrien baremazioa Sailaren erabakia da, legean aipatzen ez delako. Portzentaje horiek baloratzeko erabiltzen den sistemaren arabera, kontsolidazioa arriskuan jar dezake.
Zehazki, egokiena litzateke lan esperientziari %90eko pisua ematea eta gainerako merezimenduei %10ekoa. Aldi berean, lan esperientziari ematen zaion pisuan, esperientzia espezifikoari garrantzia gehigarria ematea, eta ez orokorra. Nolanahi ere, ELAk beste portzentaje banaketa bat balora dezake, baldin eta planteatzen badira esperientzia espezifikoaren pisua gainerako merezimenduetan erabakigarria izatea ahalbidetuko luketen merezimenduak eta puntuazioak.
2002ko LEPa gainditzeagatik 20 puntu ematea: ELAk gehiegizkotzat jotzen du merezimendu horri 20 puntu ematea duela 20 urte baino gehiago egindako LEPa dela aintzat hartuta. Gaur egungo langile askok ez dute LEP hori egiteko aukerarik izan antzinatasun txikiagoa dutelako. Berme handiagoa eskainiko luke ordezkapen zerrendetan egoteari pisu handiagoa ematea eta LEP gainditu izanari gutxiago ematea.
Aldi berean, ordezkapen zerrendetan langile asko daude inoiz eskola publikoetan lan egin ez dutenak. Beraz, zerrendetan egongo litzatekeen puntuazioa banakatzea plantea daiteke. Horrela, zerrendetan egotean puntuazio eta puntuazio handiagoa ematen zaio zerrendetan egoteagatik eta noizbait eskola publikoetan lan egin izanagatik.