ELAk sektoreko lehen hitzarmena sinatu du

ELAk, ordezkaritzaren %60 baino gehiago izanik, Gasteizen sinatu du Arabako Egoitza eta Etxebizitza Komunitarioen lehen hitzarmena. Hitzarmenak lau urteko indarraldia izango du (2025-2028) eta %32,5eko soldata-igoera jasotzen du; horrela, oinarrizko soldata 1.500 eurokoa izango da hilean 2028an. Gainera, orduko prezioa %40,5 igoko da.

Hitzarmenak beste hobekuntza batzuk ere jasotzen ditu: lanaldia 100 ordu murriztea lau urtean, libre aukeratzeko lau egun mantentzea, urtean gutxienez 15 asteburuko atsedenaldia, ordu osagarrien arautzea, hitzarmenaren blindajea, azterketa psikosozialak egitea eta berdintasunaren, LGTBI kolektiboaren eta euskararen arloko neurriak ezartzea. ELAren arabera, aurrerapauso garrantzitsua da estatuko hitzarmenarekin alderatuta, orain arte aplikatu izan dena.

Hitzarmenaren sinadurarekin amaiera eman zaio Arabako sektoreko gatazkari, sei urteko mobilizazioen eta ia 60 greba egunen ondoren. Abenduan lortutako aurreakordioa gaur formalizatu da.

Hala ere, ELAk ohartarazi du akordioa aurrerapauso bat dela, baina ez dela nahikoa egoitzen kudeaketa eredua aldatzeko, non errentagarritasun ekonomikoak zaintzaren gainetik jarraitzen duen. Sindikatuak berretsi du lanean jarraituko duela lan baldintzak hobetzeko eta zaintza eredu publiko baten alde egiteko, eta borroka enpresaz enpresa mantenduko duela ohartarazi du.