Emakumea eta Familiako Esku-hartzea

Elkarretaratzea egin dute Bizkaiko Foru Aldundiak zerbitzuko langile kopurua murriztu nahi duela salatzeko

2024/02/09
Bizkaiko Foru Aldundiko enpresa batzordeak salatu du Emakumea eta Familia Esku-hartzea zerbitzuko 3 psikologoren lanpostuak amortizatu nahi dituztela, 15 urtetik gorako esperientzia dutenak eta indarkeria matxistan espezializatutako prestakuntza dutenak. Foru Jauregiaren aurrean egindako elkarretaratzean, batzordeak adierazi du Enplegu, Gizarte Kohesio eta Berdintasun Sailaren erabakiak galera handia dakarrela biktimen arretaren kalitatean. "Zerbitzu honek Bizkaian indarkeria matxista desagerrarazteko lan egiten du, eta, beraz, psikologiaren arloko profesionalak kentzea ulertezina da, are gehiago indarkeria matxistak indarkeria jasaten duen pertsona bakoitzaren osasun psikologikoan, afektiboan eta emozionalean eragin zuzena duenean. Zerbitzuak Bizkaiko edozein emakume eta haren seme alabak artatzen ditu eta murrizketa horrek galera handia ekarriko luke biktimen arretaren kalitatean", deitoratu dute.

1987an sortutako zerbitzu horretan indarkeria matxistaren biktima diren Bizkaiko emakumeak eta haien seme-alabak artatzen dira. Sortu zenetik eta urteetan zehar, indarkeriaren biktimei arreta emateko programa eta zerbitzu berriak sortzen berritzailea eta aitzindaria izan da. Zerbitzua indarkeria matxistaren biktimen beharretara egokitu da urte hauetan, eta genero ikuspegia eta gizarte aldakei egokitu da. Zerbitzu honen egungo taldea 4 gizarte langilek, 4 psikologok, 6 administrarik eta Administrazio Orokorreko teknikari batek osatzen dute. Diziplinarteko talde horrek aukera ematen du emakumeen eta haien seme-alaben beharrei esparru global eta integral batetik erantzuteko. Sortu zenetik, beti hartu da kontuan diziplinarteko lana egiteko beharra.

Batzordeak azpimarratu du indarkeria matxistak eragin sozial eta psikologiko handia duela indarkeria jasaten duten pertsonengan. Horregatik, beharrezkoa da ikuspegi integrala eta globala izatea indarkeria matxistaren biktima diren emakumeak artatzeko eta berreskuratzeko prozesu osoan.