Eusko Jaurlaritzaren lan eskaintza publikoak behin-behineko 45.000 langileen %10 besterik ez du beteko

2021/12/22

ELAk salatzen du Gobernu Kontseiluak abenduaren 21ean erabaki zuen ia 4.000 lanpostuko lan eskaintza publikoa ez dela nahikoa, une honetan Eusko Jaurlaritzaren ardurapeko eremuetan 45.000tik gora behin-behineko langile baitago, hots, %40ko tasa, Estatu eta Europa guztiko handiena. Gainera, sindikatuek negoziazio mahaietan ez da onartu LEP hori. ELAk gogoratu du sindikatuek ez dutela onartu lan eskaintza publiko hori ez mahai orokorrean, ezta sektorialetan ere.

Osakidetzari dagokionez, LEPak 1.273 lanpostu aterako ditu, baina behin-behineko enplegu tasa %58koa da: 24.000tik gora langile, zeintzuetatik 9.000k 8 urtetik gorako antzinatasuna duten. Ez da nahikoa bajak ordezkatzeko, gainera.

Hezkuntzan Jaurlaritzak 1.856 lanpostu aterako ditu, eta behin-behineko enplegu tasa %48koa da: 15.000tik gora langile, zeintzuetatik 6.000k 8 urte edo gehiago daramaten lanean.

Administrazio orokorrean LEPean 435 lanpostu aterako dira, baina behin-behineko portzentajea %56tik gorakoa da: 3.800 langile, eta hauetatik 2.300ek 8 urte edo gehiago daramate lanean.

Ertzaintzarako 424 plaza jaso dira LEPean; horrek ez ditu aurten izango diren bajak ere osatuko. Gainera, Ertzaintzaren egungo lantaldea 7.600 poliziek osatzen dute, hitzartutako 8.000tik oso urrun.

ELAk Eusko Jaurlaritzari hitzetatik harago joateko galdegin dio, eta negoziazio mahai bakoitzean kontsolidazio prozesu garantista, negoziatu eta sindikatuekin adostuak abia ditzala. Ezin da ahaztu behin-behinekotasuna Jaurlaritzaren erabakiaren ondorio dela, enplegu publikoa prekarizatzea eta pribatizatzea baita bere asmoa.