GIPUZKOAKO ERAKIN ETA LOKALAK

Garbikuntzako lehen greba egunak jarraipen zabala izan du

2023/05/22
Arrakastatsua izaten ari da ELAk Gipuzkoako eraikin eta lokalen garbikuntzan deitutako lehen greba eguna, Natra (Oñati) eta Copreci (Aretxabaleta) enpresek grebalariak legez kanpo ordezkatu dituzten arren. Langileek manifestazioa egin dute Donostian, hitzarmen berria sinatzeko negoziazio mahaiak blokeatuta jarraitzen duela salatzeko. Orain dela bost urte hasi ziren negoziatzen. Grebalariek pairatzen duten % 40,46ko soldata arrakala ezabatzea eskatzen dute, baina patronalak ez du mugimendurik egin. Are gehiago, ukatu ere egiten du inolako soldata diskriminaziorik dagoenik. ELAk Lan Ikuskaritzari exijitu dio premiaz joka dezala grebarako eskubidea urratzen denean. Greba maiatzaren 28ra arte luzatuko da. Hurrengo mobilizazioa maiatzaren 26an izango da, 11:00etan, Bretxa kaletik (Donostia).

5.000 langilerekin, erabat atomizatutako sektorea da garbikuntzakoa. Izan ere, askok banakako zentroetan lan egiten dute, hala nola atarietan, bankuetan... Hala ere, hainbat sektoretako langileek bat egin dute grebarekin: erakunde publikoetan; Soraluze, Beasain, Legazpi, Oñati eta Eibarko Kiroldegian; eta Estatuko Ogasunean, besteak beste. Hezkuntza sektorean, adibidez, grebak jarraipen zabala izan du Txantxiku Ikastolan, Arrasateko HHEn, Urruzuno Ikastolan, Zumarrraga Ikastolan, Urnietako Salestarrak-en... Sektore pribatuko langileak ere gelditu dira, hala nola CIE, Luzuriaga, Artadi, Urkabe, Rizar, Cidetec enpresatan. Merkataritzaren sektorean, grebara batu dira BM, Carrefour, Kiabi edota Inditexen. Bestetik, Kutxa, La Caixa, Euskadiko Kutxa eta BBVA bezalako bankuetan ere nabaritu da greba. Gainera, atariak garbitzen dituzten langile askok greba egin dute.

ELAk gogorarazi du eraikinen eta lokalen garbikuntzako sektorea erabat feminizatua dagoela, eta % 80ko partzialtasuna dutela. Horregatik, hauek dira sindikatuaren aldarrikapen nagusiak:

1. Hitzarmena indarrean dagoen bitartean, galdutako erosahalmena berreskuratzea eta hori bermatzea.
2. Partzialtasunarekin amaitzen duten klausulak.
3. Plus bat, enpresa bererako lantoki batean baino gehiagotan lan egiten duten langileentzat.
4. Lan kargak arautzea.