Gizarte Ekimeneko ikastetxetan martxorako deitutako greba egunek ere babes zabala izan dute

2019/03/15
Langileen aldarrikapenei tajuzko erantzunak emanez, gatazkari irtenbide egoki bat emateko erantzukizuna, giltza eta aukera patronal eta Hezkuntza Sailak dutela adierazi dute ELA, STEILAS, CCOO, LAB eta UGT sindikatuek Donostian manifestazioa abiatu aurretik. Gizarte Ekimeneko langileek 10 urte daramatzate lan hitzarmena berritu gabe, 10 urte soldata izoztuta eta lan kargak gero eta handiagoak dira. Bestalde, jaiotze tasaren jaitsiera medio, lanpostu galera garrantzitsua aurreikusten da datozen urteetarako.

Sindikatuen agiria:

Azken bi ikasturtetan sektorean gauzatu den 21. greba eguna da gaurkoa, ikasturte honetako 18.ena eta hilabete honetako laugarrena, eta aurreko greba egunetan bezala, gaur ere babes oso zabala izan du. Beste behin ere, milaka langile batu gara Donostian izandako manifestazioan, ikastetxe hauetako lan baldintza kaxkarren ondorioz bizi den nahigabe orokortuaren erakusgarri.

Sektore honetako langileok 10 urte daramatzagu gure lan hitzarmena berritu gabe, 10 urte soldata izoztuta, gure lan kargak gero eta handiagoak dira, eta jaiotze tasaren jaitsiera medio lanpostu galera garrantzitsu bat aurreikusten da datozen urteetarako. Langile kidego batzuek (hezkuntza-laguntzako espezialistak eta haur-hezkuntzako lehen zikloko langileak), feminizatuenak direnak, lan baldintza erabat prekarioak dituzte, DBH eta 2-DBHko irakasleak parekatzea egiteke dago oraindik; eta beharrezkoa da, halaber, Lanbide Heziketa gehiago arautzea.

Azken egunotan zenbait guraso taldek esandakoaren kontra, greba hauen helburuak argiak eta aski ezagunak dira, eta ez dute itunpeko sarea kaltetzeko edo bestelako ezkutuko asmorik. Sektore honetako langileen lan balditzen berreskurapena eta hotzekuntza dugu helburu bakarra, hobekuntza hauek gure ikastetxetan eskaintzen den eta gure ikasleek jasotzen duten hezkuntza kalitatean ere eragin zuzena dutela agerikoa izanik.

Eskaerak bestalde, zilegiak eta oso oinarrizkoak dira, eta sindikatuok negoziaketara erabat irekita eta edukietan sakontzeko prest agertu gara beti; Hala adierazi diegu berriro ere urtarrileko greba egunen ostean sindikatuok bai patronalarekin eta bai hezkuntza sailarekin izan ditugun bileretan.

Patronalak akordio puntuak non dauden badaki, eta hezkuntza sailak ezin du beste aldera begiratzen jarraitu. Bidezkoak izateaz gain, sindikatu guztiok adostutako plataforma bateratuan jasotzen diren langileen eskaerak oso oinarrizkoak dira, eta eskaera hauei tajuzko erantzunak emanez gatazkari irtenbide egoki bat emateko ardura, giltza eta aukera patronal eta hezkuntza sailak dute.

Horrela, sindikatuok langileen eskaerei erantzunez gatazkari irtenbide egoki bat emango dion prozedurarik alboratzen ez badugu ere, argi daukagu bide honetan nahi ta nahi ez hezkuntza sailaren inplikazio eta parte hartzea ezinbestekoa izango dela patronalen negoziaketarako borondate erreal batekin batera.

Hau horrela izanik, ELA, STEILAS,CCOO, LAB eta UGT sindikatuok bai patronalei eta bai Jaurlaritzari eskatzen diegu bakoitzak dagokien ardura eta erantzunkizuna bere gain hartu eta gatazka honi irtenbidea emateko neurriak har ditzatela, langileen aldarrikapenei tajuzko erantzunak emanez eta akordioak erdiestea ahalbideratuko duten planteamenduak eginez.

Azkenik, Gizarte Ekimeneko ikastetxeetako langileak zoriondu nahi ditugu beste behin ere erakutsi duten tinkotasun, indar eta konbentzimenduagatik. Harro egotekoa da gure ikastetxeetako hezkuntza kalitatean eragin zuzena duten lan baldintzen kaskastzearen aurrean, lan baldintza horien alde borrokatzeko apustua egin duten langileak izatea gure ikastetxeetan.