ELAk salatu du 12 greba egunen ondoren enpresak ez duela neurririk hartu lan osasuna eta egoiliarren arreta hobetzeko

Arrigorriagako Arandia egoitzan 12 eguneko grebaren ondoren, ELAk salatu du enpresak oraindik ez duela neurririk hartu ez langileen lan osasuna hobetzeko, ezta egoiliarren arreta kalitatea hobetzeko ere. Grebak jarraipen ia erabatekoa izan du, nahiz eta gutxieneko zerbitzuak gehiegizkoak izan diren.

Arazo nagusia da arrisku psikosozial larri baten aurrean ez dela neurririk hartu, duela gutxi txosten batean atzemandakoa eta agerian uzten dituena gehiegizko lan kargak, langile faltaren eta bajak ez ordeztearen ondorioz. ELAk salatu du froga horiek egon arren, enpresak ez duela konponbiderik eman ez arriskua murrizteko ezta langileen egoera arintzeko ere.

Testuinguru horretan, langileen aldarrikapen nagusia da zentroko errealitatera egokitutako arrisku psikosozialen ebaluazioa egitea, lan gainkarga murrizteko neurri eraginkorrak hartzeko. Langileek adierazi dute egoera jasanezina dela eta “zaintzen dutenak zaintzeko” beharra aldarrikatu dute.

Egoera honi gehitzen zaizkio nominetan dauden irregulartasun larriak, hala nola jaiegun berezien (urtarrilaren 1a eta abenduaren 25a) oker ordaintzen direla edo ez direla ordaintzen, eta jaiegun arruntak ez dira ordaintzen. Gainera, bi nominako sistemak nahasmena, gardentasun falta eta soldaten kalkuluan ziurgabetasuna sortzen ditu.

Lan baldintzak okertzen ari diren arren, langileek euren konpromisoa eta profesionaltasuna mantentzen dute eguneroko arretan. Hala ere, enpresaren aurrerapauso ezaren aurrean, ELAk greba jardunaldi berri bat iragarri du ekainaren 15erako.