ELAk irakasleentzako IRALE formazio ikastaroak berriz ezartzea eskatu dio Jaurlaritzari
Ikastaro horietarako liberatutako irakasleei erabakia jakinarazi zitzaien abian jarri bezperan, eta erabakia behin-behinekoa izango zela esan zieten, zehazki, urtarrilaren 28ra arte. Ez zen inolako elkarrizketarik izan sindikatuekin, eta Sailak bere kabuz jakinarazi zuen erabakia.
Bada, urtarrilaren 28rako bi egun falta direnean, sindikatuek ez dute Hezkuntza Sailaren asmoen berri. Egoera berean daude liberazioa eten zitzaien pertsonak, ordezkapen horiek egiteko kontratatutako pertsonak eta IRALEko hiruhileko honetako ikastaroak emateko kontratatutako irakasleak.
Ildo horretan, ELAk idazki bat aurkeztu dio Hezkuntza Sailari, honako eskaera hauekin:
- Euskalduntzearen aldeko benetako apustua egin dezala.
- IRALEko ikastaroak eta liberazioak berrezar ditzala, ikastaroaren iraupena luzatuz aste horietan galdutako egunak berreskuratzeko.
- Enpleguaren aldeko apustua egin dezala. Ordezko gisa kontratatuak izan diren ordezkoak mantentzeaz gain, eskoletan osasuna bermatzeko beharrezko kontratazio guztiak gauzatuz, zein IRALEko hiruhileko ikastaroak emateko izendatuak izan diren behin-behineko irakasleei lana bermatuz.
- Alde bakarreko erabakiak hartzeari utz diezaiola eta sindikatuekin langileei eragiten dieten gaiak partekatu eta adostu ditzala.
ELAren ustez, onartezina da ikastaroak bertan behera uztea ordezkapenak egiteko irakasle falta dagoela aitzakia hartuta. Izan ere, milaka irakasle daude oraindik ordezkapenak egiteko behin-behineko zerrendetan kontratatuak izateko zain. Halaber, badirudi Hezkuntza Sailak ez diola lehentasuna ematen Euskalduntzeari eta euskarari. “Ordezkapenak betetzeko ordezko faltarik ez dagoenean, ulergaitza da IRALEko ikastaroak bertan behera uztea”, kexu da sindikatua.