ELAk, STEILASek eta CCOOk EAEko itunpeko Lanbide Heziketako eta Haur Hezkuntzako lehen zikloko tutoretza plusa ordaintzea exijitu diete patronalei

2021/12/02
EAEko Justizia Auzitegi Nagusiaren aurrean, Bilbon, ELA, STEILAS eta CCOOk Lanbide Heziketako eta Haur Hezkuntzako lehen zikloko tutoretza plusa ordaintzea eskatu diete EAEko Gizarte Ekimeneko Irakaskuntzako patronalei, 2020ko uztailean sinatutako hitzarmen kolektiboan adostu zen bezala. Gaur, abenduak 2, tutoretza plusari buruzko epaiketa egin da. Sindikatuek gogorarazi dutenez, sektorean 29 greba egun egin ondoren, 2020ko uztailean hitzarmen kolektiboa sinatu zuten. Hitzarmenak argi eta garbi jasotzen zuen tutoretza plusa Gizarte Ekimeneko ikastetxeen etapa guztietan tutoretza lana egiten duten profesional guztiei ordainduko zaiela; izan ere, aurreko hitzarmenean ez bezala, 2020an sinatutakoak ez du ordainketa horretn etaparik bereizten. Patronalek, ordea, uko egiten diote sinatutakoa betetzeari, eta tutoretza plusaren ordainketatik kanpo utzi nahi dituzte Lanbide Heziketako eta Haur Hezkuntzako lehen zikloko profesionalak.

Gauzak horrela, patronalek plus hori ez ordaintzea aholkatu diete ikastetxeei, batzuk ordainketa egiten hasiak ziren arren. Behin sindikatuak auzitegietan plusa erreklamatzeko erreklamazioak aurkezten hasi zirenean, patronalek gatazka kolektiboa aurkeztu dute.

Sindikatuek gogorarazi dutenez, gatazka gogor eta luze baten ondoren, 2019ko azaroan ELAk, STEILASek eta CCOOk grebari amaiera eman zion akordio bat erdietsi zuten, eduki garrantzitsu eta bikainekin Gizarte Ekimeneko ikastetxeentzat. Eduki horiek 2020ko uztailean sinatutako hitzarmen kolektiboan islatu ziren. Sindikatuek adierazi dutenez, hitzarmena idaztea ere konplikatua izan zen patronalaren jarreragatik, itundutakoaren terminoak desitxuratu eta aldatu nahian aritu zelako.

Sindikatuek uste dute justiziak arrazoia emango diela. Hala ere, argi utzi dute adostutakoa defendatzen jarraituko dutela, eskura dituzten baliabide guztiak erabilita.