Haurreskolak Partzuergoa

Grebak %85etik gorako jarraipena izan du

2025/01/28
ELA, LAB eta Steilas sindikatuek deitutako grebak jarraipen zabala izan du. 1.500 haur hezitzaile eta kudeaketa alorreko langile daude grebara deituak. Hala ere, beste behin ere, salatzekoa da Eusko Jaurlaritzak ezarritako gehiegizko gutxieneko zerbitzu direla eta hamarnaka langileri greba eskubidea ukatu zaiela, batez ere Haurreskola txikietako haur hezitzaileei, eta, ondorioz, greba bera baldintzatua geratzen dela. Grebaren arrakastaren adibide garbia da Eibarren “Lan baldintzak hobetu, hemen eta orain erabakita!” lelopean deitutako manifestazioan ehunka langile elkartu izana.

Bestalde, aipatu beharra dago deialdiaren bezperan greba zikloa bertan behera uzteko saiakera egin zuela Hezkuntza Sailak, orain arte mahai gainean egon diren edukiak txertatuta zituen aurreakordio proposamena ekarriaz bat batean deitutako mahai negoziatzaile batera.

Aipagarria da hainbat eta hainbat haurreskolek %100ean greba babestu izana, esaterako:

  • Araban: Gurutzmendi, Landaberde, Mariturri, Katagorri eta Bernedo.
  • Bizkaian: Mungia, Portugalete, Zaldibar, Bilboko Deustu eta Sanchez Marcos.
  • Gipuzkoan: Urretxu-Zumarraga, Hernani, Lasarte, Deba eta Donostiako Bidebieta eta Ategorritxo.

Hezkuntza Sail berria dago, eta honekin batera, Zuzendaritza Batzorde berritua. Hala ere, azken urteetako jokamolde berbera dute, Haurreskolak Partzuergoaren langileon lan baldintzak arautzen dituen 2009ko lan hitzarmena berritzeko eduki nahikorik gabeko mahaiak deitu eta etengabe luzatzen dituztelarik. Greba hauetako aldarrikapenei erantzungo dieten proposamenak mahai gaineratzeko eskatzen dute sindikatuek, besteak beste; lan zamak arindu, gazteberritze plana negoziatu eta adostea, erosahalmena berreskuratu, enplegua egonkortu eta bermatzea, ordezkoen lan baldintzak eta langile guztion lizentziak eta baimenak hobetzea eta lan osasuna, berdintasun eta euskara planak garatzea.

Urtarrilaren 29a ere greba eguna da Haurreskolak Partzuergoan eta kontzentrazioak egingo dira EAEko hiru hiriburuetako Hezkuntza ordezkaritzetan, goizeko 11:30ean.