UPV/EHU

Irakasle eta ikertzaileek hilean 800 euro bakarrik kobratuko dituzte

2023/07/06
Hemendik aurrera, EHUko irakasle bat lanaldi osoan ordezkatzen dutenek hilean 815 euro gordin baino ez dituzte kobratuko. Hori da UPV/EHUko errektoretza taldeak bere kabuz hartutako azken erabakien ondorio nagusietako bat, ordezko irakasleen lan baldintzak aldatu ondoren. Orain, ordezkapen kontratu berriei irakaskuntza funtzioak baino ez zaizkie aitortuko, eta lanaldi osoaren erreferentzia oinarria 18 kreditukoa izango da, orain arte aintzat hartu diren 24 kredituen ordez. ELAk salatu du erabaki horrek ordezko irakasleen prekarizazioan sakonduko duela eta gainerako irakasleen irakaskuntza karga handitu. Bereziki larria da lanaldi partzialeko ordezkapen kontratua duten pertsonen egoera. ELAk ziurtatu du errektoretza taldeak emandako pausoek erakusten dutela UPV/EHUn ez dagoela negoziazio kolektiborik. Horregatik, mobilizazioaren aldeko apustua egin du.

Soldata galtzeaz gain, sailen irakaskuntza gaitasuna murriztu eta irakaskuntza karga handitu nahi dute. Izan ere, lanaldi osoko ordezkapen kontratu berrien erreferentzia oinarria 18 kreditu badira eta dagozkien asteko irakaskuntza orduak sei badira, zortzi beharrean, saileko irakasleak arduratu beharko dira klase horiek emateaz.Gainera, ELAk ohartarazi du zailtasunak egon daitezkeela behar horiek erantzuteko hautagaiak aurkitzeko, eskaintzen diren lan baldintzak ez direlako onak.

ELAk gogorarazi du murrizketak etengabeak direla EHUn. "Irakasle eta ikertzaileen hitzarmen kolektiboan ikerketa kolektiboei dagozkien artikuluak aldatu ondoren eta erretiroei buruzko akordioa ezabatu ondoren, ordezko irakasleen lan baldintzen azken aldaketa horrek erakusten du errektoretza talde horren noraeza neoliberala eta unibertsitate honetako langileen eskubideekiko errespetu eskasa", deitoratu du.