Sindikatuen ehun bat ordezkarik hitzarmena berritzea eskatu dute Bilbon

ELA, STEILAS, CCOO, LAB eta UGT sindikatuen ehun ordezkari inguru batu dira hainbat ikastetxez inguratuta dagoen Bilboko Bizkaia plazan, patronalei arduraz jokatzeko eta hitzarmena berritzea ahalbideratuko duten eduki eta proposamenak egiteko eskatzeko. Aldarrikapen nagusiak lan zamak arintzeko neurrietan, sektore feminizatu eta prekarizatuenentzat hobekuntzetan, KPIa bermatuko duten soldata igoeretan, lanpostuak mantentzeko neurrietan eta Lanbide Heziketako edukietan oinarritzen dira. Euskara planak, berdintasun planak eta lan osasuna eta bereziki arrisku psikosozialak abordatzeko planak ere jomugan ditugu sindikatuek.

Azken mahai negoziatzailea azaroaren 27an deitu zuten patronalek greba dinamikak behartuta, aurrekotik 9 hilabete ziren igarota (otsailaren 2tik). Mahaian, ordea, ez zen aurrerapausorik eman, patronalek ez baitzuten hitzarmena berritu ahal izateko proposamenik ekarri. Horregatik, sindikatuek abendurako deitutako bost greba egunekin aurrera egitea erabaki dute.

Sindikatuek birritan bilera eskatu ondoren, Hezkuntza Sailak adierazi du bilera egiteko prest dagoela. Itundutako eskolek dituzten finantzaketa iturrien gaineko gardentasuna kontrolatzeko ardurarekin batera langileen lan baldintza egokiak bermatzeko ardura berea ere bada. Hala adieraziko diote bilera horretan sindikatuek, eta gatazka bideratzeko esku har dezala.

Sindikatuek gogorarazi dute ikastetxe horietako langileek lau greba egun dituztela eginda, lehena apirilaren 25ean eta hiru egun jarraian urriaren 17, 18 eta 19an. Greba jardunaldiek jarraipen zabala ari dira izaten, %65ekoa batezbeste. Baina hitzarmena berritzeko aukera emango duen proposamenik izan ezean, urtarriletik aurrera grebak indartuko dituztela iragarri dute.