Justiziak ELAri arrazoia eman dio eta ebatzi du udalak eskubide sindikalak urratu dituela
Bilboko Udalak langileen eskubide sindikalak urratu ditu. Hala ebatzi du EAEko Justizia Auzitegi Nagusiak, eta arrazoia eman dio ELAri, Udalak ELAko langile batzuei sindikatuak antolatutako ekitaldi batera joateari uko egin ostean. Eskubide hori lan hitzarmenean jasota dago.
2024ko urrian, ELAk Bilboko Udalean zuen atal sindikalak bere afiliazioa gonbidatu zuen sindikatuaren ekitaldi batean parte hartzera, La Casilla pabiloian. Eskubide hori Udaleko lan harremanak arautzen dituen hitzarmen kolektiboan jasota dago.
Akordioak, besteak beste, jasotzen du atal sindikaletako afiliatuek eskubidea dutela prestakuntza ekitaldietara, biltzarretara eta antzeko jardueretara joateko. Hala ere, Udaleko Giza Baliabideen Sailak ukatu egin zion eskubide hori ELAri ekitaldia formazioa ez zela argudiatuta.
Sindikatuak gertatutakoa salatu eta kautelazko neurriak eskatu zituen, eta ondoren, lehen auzialdiko epaiak Udala zigortu zuen eskubide sindikalen erabilera urratzeagatik.
Udalak apelazioa aurkeztu zuen. Orain, ordea, Euskal Autonomia Erkidegoko Auzitegi Nagusiak berretsi egin du lehen auzialdiko epaia, apelazioa atzera bota du, eta berretsi egin du hitzarmen kolektiboaren artikuluak egun batzuk aitortzen dituela sindikatu prestakuntzako ikastaroetara, biltzarretara eta antzeko jardueretara joateko. Horrela, baimen honetan hainbat jarduera sartzen dira, ez bakarrik formazioa, baita aldarrikapen ekintzak ere, sindikatuen eta Administrazioaren arteko itunetik eratorritako arau batek ezarritako jarduera sindikaletarako baimena baita.
Gauzak horrela, Euskal Autonomia Erkidegoko Justizia Auzitegi Nagusiak uste du Udalak urratu egin dituela akordioetan jasotako eskubide sindikalak.
ELAk "kezkagarritzat" jo du Udalaren jarrera. "Jarduera sindikalaren aurka egitea euskal gizartearen aurrerapen sozialaren aurka egitea da, eta kezkagarria da, hain zuzen ere, gure erakundeetako agintariak izatea sindikatuen aurkako borrokaren bultzatzaileak", kexu da.
Bestalde, oso larritzat jo du Bilboko Udala bezalako erakunde publiko batek bere konpromisoak ez errespetatzea eta lan hitzarmena urratzea.