Navarra Sumak aurkeztu eta Geroa Baik babestutako erlijioko irakasleentzako lege proposamena gaitzesten du ELAk
ELAk Espainiako Estatuaren eta Vatikanoaren arteko akordioak eta Eliza Katolikoari hainbat gaitan, besteak beste Hezkuntzan, ematen zaion salbuespen-egoera gaitzesten dituela berresten du. Ildo horretan, ELAk uste du hezkuntza-gaitasun osoa, hezkuntza-curriculuma eta langileen kontratazioa Nafarroako Gobernuari bakarrik eta inolako baldintzarik gabe egokitu behar zaizkiola. Ildo beretik, sindikatuak uste du erlijio konfesionalen irakaskuntza kendu behar dela, eta Nafarroako Gobernuari eta horren alde dauden alderdiei eskatzen diegu LOMLOEren egungo arau-esparrua gainditzeko, erlijio konfesionalaren irakasgaia mantentzearen aldeko apustua egiten baitu.
Era berean, sindikatuak uste du irailetik aurrera erlijioa astean gutxienez ordu 1era murrizteak, Haur eta Lehen Hezkuntzan LOMLOEk ahalbidetzen duena, ez duela eragotzi behar sindikatuekin adostutako eta negoziatutako irtenbide bat bilatzea Administrazioarekin lan-kontratu mugagabea sinatuta duten langileentzat. Konponbide horrek erlijioko irakasleen lan-eskubideak eta hezkuntzako gainerako irakasleen lan-eskubideak uztartu behar ditu.
ELA ez dago ados Navarra Sumak aurkeztutako eta Geroa Baik babestutako lege-proposamenarekin. Proposamen hori aldatu edo osatu ezean, diskriminatzailea izan liteke gainerako irakasleekiko.
Horregatik guztiagatik, ELAk Hezkuntza Departamentuari eskatzen dio benetako negoziazio-prozesu bat egin dezala sindikatuen ordezkariekin. Sindikatuaren iritziz, prozesu horrek Nafarroako Administrazioaren zerbitzura dauden irakasleen berezko araudi guztia bete behar du, gainerako irakasleek bezala. Era berean, prozesuak konfesio-irakasgaia desagertzearekin batera amaituko den trantsizioa jaso behar du, erlijioko egungo irakasleen lan-eskubideak errespetatuz. Kolektibo horrek 2013an kaleratzeak jasan zituen artzapezpikutzaren eta UPNren gobernuaren aldetik, Rajoyren lan-erreforman ezarritako gutxieneko 20 eguneko kalte-ordaina aplikatuta.