Eusko Jaurlaritzak espetxeen arloan izandako jokaerak agerian utzi du Estatuko ereduari jarraipena emateko asmoa duela

2021/09/23
Eusko Jaurlaritzak espetxeen arloan izandako jokaerak agerian utzi du Estatuko ereduari jarraipena emateko asmoa duela
ELAk adierazi duenez, espetxeen eskumena transferitzeko astebete falta denean, Eusko Jaurlaritzak jarraipena eman nahi dio Espainiako Estatuko ereduari. Asmo hori duela dirudi, izan ere, joan den astelehenean, irailaren 20an, sindikatuekin egindako bileran proposamen berri bat berehala aurkezteko konpromisoa hartu bazuen ere, oraindik ez du proposamenik egin, eta ez du bilerarik deitu ere. "Gaur mahai gainean dagoen dokumentua Espainiako Estatuko ereduaren jarraipena besterik ez da. Euskal espetxe-eredu modernoago eta gizatiarrago baten aldeko propaganda instituzionaletik haratago, bere jarduerak helburu horretatik oso urrun daude, lan-arloan behintzat, eta eredu propio bat garatzeko aukera hipotekatzen dute ", salatu du sindikatuak, preso dauden herritarren eskubide guztiak errespetatuko dituen sistema publiko eta gizatiarrago baten alde eginez, emakumeen egoera azpimarratuz.

Gainera, ELAk gogorarazi du ostiral honetan, irailaren 24an, Beatriz Artolazabal Eusko Jaurlaritzako Justizia Sailburua Zaballako zentroan izango dela ekitaldi batean, Mesedeetako egunean, Espainiako espetxeetako zaindariaren egunean. "Estatu eredu horren aldeko apustua indartu besterik egiten ez duen ekintza da", deitoratu du ELAk.

Gauzak horrrela, Eusko Jaurlaritzak iraganeko hipotekarik gabeko espetxe-sistema propio baten alde egiteko borrokan jarraituko duela azpimarratu du ELAk, askatasunik gabeko pertsonen gizarteratzea lortzeko helburuaz.

Horretarako, ezinbestekotzat jo du espetxeetako langileentzat lan-baldintza duinak bermatzea. Lan-baldintza horiek hobetzeko, bai soldatak, bai ordutegiak eta lanaldiak hobetu behar dira, Autonomia Erkidegoan lan egiten duten gainerako langileekiko diskriminaziorik gabe, betiere kontuan hartuta eguneko 24 orduetan pertsonekin lan egiteak dakartzan baldintza bereziak, urtean 365 egunez.

Era berean, beharrezkoa da langile gehiago izatea, berehala lan-eskaintza publiko bat eginez; euskalduntze- eta berdintasun-plan bat hasteko epeak adostea, edukiekin; eta espetxeetako langileentzat prestakuntza-plan egoki bat sortzea, uneoro osasuna eta segurtasuna bermatuta.