2026ko aurrekontuetan behin-behinekotasuna murrizteko eta langile publikoen erosteko ahalmena berreskuratzeko neurriak jaso behar dira

Eusko Jaurlaritzak urriaren 21erako deitu du 115.000 langileen lan baldintzak negoziatzeko mahai orokorra. Bertan, Eusko Jaurlaritzak sindikatuei aurkeztuko die 2026rako zein soldata igoera proposatuko duen, eta lan baldintzekin zerikusia duten eta Aurrekontuen Lege Proiektuan ezarriko diren neurriei buruzko informazioa emango du. Azken urteotako aurrekontuek onartu egin dute Madrilek ezarritakoa betetzea gai horietan. Horregatik, ELAk uste du badela garaia langile publikoen baldintzak hemen erabakitzeko, bai enplegua, bai soldata, are gehiago une honetan transferentziak berriro negoziatzen ari direnean.

Gogora dezagun azken urteetan onartutako aurrekontuetan Eusko Legebiltzarrak erabaki duela Madrilen esku uztea bere langileen lan baldintzak. Eusko Legebiltzarrak uko egin dio Eusko Jaurlaritzako langileen soldata eta enplegua bezalako gaietan dituen eskumenak erabiltzeari. Ondorioz:

• Eusko Jaurlaritzako langileen % 42 aldi baterakoa da. 27.000 langile baino gehiago Osakidetzan, plantillaren erdia. Hezkuntzan, 25.000 baino gehiago, % 55. Eusko Jaurlaritzaren behin-behinekotasuna sektore pribatuarena baino hiru aldiz handiagoa da.
• Plantillak, oro har, ez du soldata igoerarik izan 2025ean, eta soldata galera % 8,6koa da 2022tik aurrera.
• Euskarak bigarren mailako hizkuntza izaten jarraitzen du.
• Lan kargek, ordezkapenik ezak eta gehiegizko burokratizazioak ondorio larriak dituzte langileen lan osasunean.

Baldintza horietan, oso zaila da langileek kalitatezko prestazioak bermatzea. Horregatik, ELAk zerbitzu publikoen aldeko erabakiak hartzeko eskatuko dio Eusko Jaurlaritzari, herritarren beharrak asetzeko. Aurrekontu proiektuan jarrera aldatu behar du eskumenak alde batera uzteari dagokionez, eta soldaten eta enpleguaren arloko erabakiak hartu behar ditu. Zehazki, honako neurri hauekin:

• Enpleguan, pribatizaziorako ateak itxiko dituen artikulu bat ezarri behar da, eta arlo publikora itzultzeko prozesuak aurreikusi behar dira, langileen subrogazioa bermatuz. Era berean, benetako behin-behinekotasuna % 8ra murrizteko formulak ezarri behar dira, aldi baterako langileak finkatzea ahalbidetuko duten prozesu bermatzaileak deituta.
• Soldatetan, 2026ko aurrekontuek % 8,6ko soldata igoera + 2025eko KPI ezarri behar dute langile guztientzat. Lanaldiari dagokionez, 32 orduko lan jarduna eta hori ezartzeko partida.
• Lan osasuna hobetzeko, partida bat ezarri behar da gehiegizko burokraziarekin amaitzeko eta sektore bakoitzeko lan kargak arintzeko.
• Euskaren, partida bat sartu behar da langileen euskalduntzea planifikatzeko.
• Genero ekitatean, sektorez sektore benetako berdintasun planak negoziatzeko eta adosteko konpromisoa ezartzeaz gain, hori posible egiteko partida bat sartu behar da.
• Plantilla gaztetzeko neurriei dagokienez, partida bat ezarri behar da gehiengo sindikalarekin sektorez sektore plantillak gaztetzeko neurriak negoziatzeko eta adosteko. Besteak beste, erretiro partziala berrezarriz.

Bileraren aurretik, egun horretan bertan, eta Eusko Jaurlaritzari erabaki horiek har ditzala eskatzeko, ELA sindikatuko ordezkariek mobilizazio bat egingo dute 9: 30ean Lakuan, eta bertan adierazpenak egingo zaizkie hedabideei.